Mizoram Muaythai team feh chhuak

National Muaythai Championship 2022 chu June 16-22 chhung hian Dewas, Madhya Pradesh-ah neih a ni dawn, inelna hmachhawn turin Mizoram Muaythai Team te an feh chhuak - Inrinni khan inelna neihna tur hmun panin an kal.

Mizoram aiawh turte hi player 10 niin Ramhlun Indoor Stadium-ah hun engemawchen training an nei a, coach Lalchhuanawma chuan "State dangte angin players intir tam thei lo mah ila a kal chhunten gold medal lak vek kan tum dawn a ni," a ti.

Mizo player 10 bakah hian National and International Referee & Judge pahnih Liansangpuii Renthlei leh Lalhlimpuia te an kal bawk.

India ram pum huap inelna lian National Muaythai Championship awm turah hian player 700 chuang hming pe lut an awm a, India ram state tin aṭangin player kal thei vek tura beisei an ni.

Nikum khan National championship hi Manipur chuan thlengin sum harsatna leh hrileng avangtein Mizoram aiawha kal thei an tam lo a, gold medal pakhat, silver medal pahnih leh bronze medal pahnih an dawng.

Kum 2019-a Karnataka-in a thlen tumah khan Mizoram chu a pumpuia team champion an ni a, kum 2018-a Himachal Pradesh in a thlen ṭumah pawh team champion an ni tawh bawk.

Mizoram aiawha kalte:
1 Eric Biakthinghlima 54Kg Ṭhuampui
2 H.Davidson Singha 48Kg Bawngkawn
3 Joseph Laldinsanga Halliday 71Kg Ṭhuampui
4 Lalngaihawma 51Kg Hunthar
5 RC Rohlupuia 71Kg Dinthar
6 TC Lalrinawma 57Kg Ṭhuampui
7 Vanlalmalsawmzuala 57Kg Ramhlun North
8 Zomuanpuia 45Kg Tuithiang
9 Paul HD Lalruatkima 54Kg Phuaibuang
10 Ngursaimawia 60Kg Luangmual
Coach Lalchhuanawma Zemabawk
Referee & Judge:
1 Liansangpuii Renthlei Zemabawk North (MRP)
2 Lalhlimpuia Zonuam (Mizoram Police)