India tan Remsiami goal a tawk lo

Ram hrang hrang hockey thiam zual inelna 2021–22 Women's FIH Pro League neih laiah Lalremsiami Hmar chuan goal a khung a, mahse a goal khat hi India chak nan a tawk zo lo - Belgium lakah 2-1 in an chak lo.

Inrinni tlai khan mualneitu Belgium lamin captain Nelen Barbara hmangin minute thumna lekah goal hmahruai an khung a, quarter thumnaah Andre Ballenghien chuan an goal hnihna a khung bawk.

India tlarhnung a phui tawk lo a, an hma lam an hriam tawk lo deuh bawk. Mualpho belh thei dinhmuna an din laiin Mizo nula Remsiami chuan goal khatin a chhang let a, goal dang erawh a lut zui tawh lo.

Striker chhuanvawr Rani Rampal chuan India tana a match 250-na a khel a, mellung pawimawh a phun ni hian goal a pai tel lo. Belgium lamin tharum an ngahin an huaisen a, anmahni khelmual a nih bawk avangin India tan a harsa.

League a nih avangin ram hrang hrangte an inkhel kual zel dawn. Nizan khan Belgium nen bawk hian an inkhel nawn a, an result erawh kan hre hman lo. Belgium hnuah Argentina leh United States an la hmachhawn leh bawk ang.

Tournament hi nikum lam aṭanga khelh ṭan tawh kha niin, a khat tawkin ram hran hranah an khel ṭhin - ruahman dan chuan kuminah an khel zo ang; ram pakua inel zingah India hi pathumna an ni mek.