Euro 2020 final rematch-ah chak zawk an awm lo

UEFA Nations League-ah England leh Italy te goal awm loin Molineux Stadium-ah an inhnehtawk. League A group 3 inkhel dangah Hungary leh Germany te 1-1 in an inhnehtawk bawk.

Final rematch chu
Euro 2020 final-ah Italy-in penalty shootout hmangin England an hneh a, European champion an ni. Chutihrualin Wembley Stadium-a final khelh kha minute 90 chhung khelh chu ni se 1-1 in an inhnehtawk ang.

Wembley Stadium-a final khelh ṭumah England ṭantute an chet mawi loh avangin tun ṭumah hian hrem an ni a, Molineux Stadium-ah entu an awm lo.

Gareth Southgate-a hoten Nations League-ah chak la nei lo mah se an la inenchhin zel a, bench-ah Harry Kane a awm avangin Raheem Sterling-a'n captain hna a chelh a, Tammy Abraham a mal tlat.

Three Lions tan Euro 2020 final-a bul ṭan chu Harry Maguire, Kieran Trippier, Declan Rice leh Raheem Sterling te chauh an awm. Heti chung hian Italy an inthlak nasa zawk - Gianluigi Donnarumma leh Giovanni Di Lorenzo te chiah final-a bul ṭan an awm.

A goal lo
Italy-in chance ṭha an nei hmasa a, Sassuolo midfielder Davide Frattesi-a'n keeper Aron Ramsdale chiah a hmachhawn hnuah goal zawnah a pet lo.

England pawhin hun ṭha neiin Sterling a ball pek chu Mason Mount-a'n hnai tak aṭangin crossbar a pet per. Three Lions-in chance ṭha bik an hlah a, Azzurri midfielder Sandro Tonali ball pet pawh Ramsdale-a'n a dang ṭha hle.

Inkhelh hun chanve hmalamah chance ṭha tam mah se inkhel chawhnu lamah erawh chance ṭha bik tia sawi tur a awm lo. Euro 2020 final rematch-ah goal a lut lo.

Hartharna maw!
Germany-in Hansi Flick hnuaiah harhtharna an chang a, World Cup qualifier-ah match sarih chak zawn nghalin Europe ram zinga World Cup khel tura tling hmasa ber an ni.

Mahse, kuminah erawh Germany hian friendly match-a Israel an hneh hnuah chak an la nei leh lo. Team langsar Netherlands, Italy, England bakah team naran Hungary thlengin 1-1 vekin an draw pui.

Puskas Arena Park-ah Hungary tan minute rukna lekah Zsolt Nagy-a'n minute rukna lekah chiang zetin a khung a, Germany-in minute thum hnuah Jonas Hofmann hmangin an sut.

Hansi Flick-a hoten ball chang tamin inkhel thunun mah se Hungary-in chak theihna chance ṭha an nei a, goal dang erawh a luh belh lo. Nations League aṭanga thlir chuan Bayern Munich manager hlui Flick hnuaia Germany harhtharna hian belhchian a dawl tawk lo.