Man United-in De Jong an beisei

Manchester United chuan Barcelona midfielder Frenkie de Jong lakluh beiseiin Catalan club an dawr a, Barca chuan an midfielder hi pound maktaduai 85 aia tlawma chhuahtir an tum lo nia sawi a ni.

Sports journalist lar Fabrizio Romano tarlan danin, United hian pound maktaduai 51.25 pek phawt a, a khelh ṭhat dan a zira pound maktaduai 8.54 pek turin an dawr a, mahse, hei hi Barcelona chuan an lo hnar.

Hetihlai hian BBC chuan United hian official takin an ngamna zat Barca hnenah an la thlen lo niin an tarlang thung a, Romano sawi hi chu ṭawngkaa an inbiakna mai a nih hmel.

United hi coach thar Erik ten Hag hnuaiah an khel tawh dawn a, Ajax boss hlui hian Dutch club lama a lo hman thiam tawh sa Frenkie de Jong hi Old Trafford lama seng luh ngei a duh.

De Jong hian a tirah Barca chhuahsan a tum loh thu Catalan club thuneitute hnenah a sawi niin khawthlang media-te chuan an tarlang a, mahse, Ten Hag hian United pan turin a hmin leh tawh niin an sawi bawk!

Kum 25 mi midfielder hian January 2019 khan Barca hi pound maktaduai 65-in a zawm a, season hman zawh takah khan match 46 khela goal li khungin, assist vawi nga a nei thei.

United hian Paul Pogba, Nemanja Matic leh Juan Mata te chu tun nipuiah free transfer-in an chhuahtir a, hei vang hian Red Devils hian central midfield chu thuam chak hmasaka neih an duh a ni.

Netherlands tan vawi 43 inlana goal khat khungtu De Jong hian Barca a pan hnuah match 139 khelin goal 13 a khungsak tawh a, assist vawi 17 a nei bawk.

Hetihlai hian United hian Champions League an khelh dawn loh avangin player ṭha hip a harsa ang tih a chiang.