Liverpool dang thei an awm lâwm ni?

Leicester City leh Manchester City tan chuan Liverpool che ṭha reng chu mang ti ang tham a ni a, anmahni ngei pawhin an dan theih loh Jurgen Klopp leh a naute hian Premier League-ah dang theitu an la tawng lo. 

Inrinni zan Premier League inkhelah Liverpool hian Tottenham Hotspur chu 1-0 in an hneh a, inkhela goal awmchhun hi Roberto Firmino khung a ni. 

Liverpool-in league match 21-ah point 61 hmuin table chung ber an luah chhunzawm zel a, he thu buatsaih laia anmahni hnaih bertu Leicester City aia an sanna chu point 16 niin match khatin an khel 

tlem zawk. Reds manager Jurgen Klopp chuan, "Kan kutah nomawi hlan a la ni lo a, kan hnathawh tur kan la thawk zo lo tihna a ni," tiin champion a la sawi ri duh lo. 

Liverpool-in ṭum dang an phak lo a, mahse he team hian champion zia an ken tel tawh miau avangin an rilru a huaisen a, rilru puthmangah Spurs player-ten an phak lo a ni ber. 

Khelh ṭhat loh lai pawhin Liverpool-in tlarhmaah world class player Mohamed Salah, Sadio Mane leh Firmino an nei a, goal an khung leh nge nge ṭhin. Brazilian striker Firmino hian minute 37-naah goal awmchhun a khung a, kum 20 mi Spurs tana a match hmasa ber kheltu Japhet Tanganga ven karah ṭha zetin a khung. 

Tottenham Hotspur Stadium-a inkhelah mualneitu team hi boss Jose Mourinho-a thiam danin defensive game-in bul an ṭan a, counter attack chhawr ṭangkai an tum - goal an chhuah hnuah erawh goal veng reng thei an ni lo tih inhriain an nawr na hle. 

Spurs-in tlarhmaa an player neih ṭhat ber Harry Kane chu hliam vangin an chhawr thei lo a, April thlenga khel thei lo tur English striker an chhawr theih loh hi an la tuar dawn chauh niin a lang. Kane awm loh laiin Son Heung-Min-a'n a mawhphurhna a hlen thei lo a, substitute Giovani lo Celso nen second half-a goal khung theihna remchang an neih chu an hlah. 

Lo Celso-a'n hnai set sawt aṭanga an chance neih a hlah hian Jose Mourinho chu khelmual sirah a ṭhingṭhi hnawk a, Chelsea boss hlui hian an hun duhawm goal-a an chantir thei lo chu a ui hle. Mourinho chuan, "Hei hi football chu a ni. A chang chuan kan phu aia ṭha zawk result kan nei a, a chang chuan kan phu ngawih ngawih pawh kan hlawh chhuak thei lo," a ti a, point khat hmuh phuah a inngai. 

Inkhel Chhehvel

•    Liverpool-in match 21-ah point 61 an nei a, European top flight football-ah match 21 hnua heti zat point nei thei hi an la awm ngai lo. 

•    Liverpool-in Premier League-a an match hnuhnung 38 aṭangin point 104 an nei tawh a, he inelnaa match 38 aṭanga point hlawh chhuak hnem ber record an siam - Manchester City (102; 2018) leh Chelsea (102; 2005) an khum a ni. 

•    Spurs-in Mourinho hnuaia inelna hrang hranga match 13 an khelh aṭangin goal 20 an chhuah a, England-a coach hna a thawh hmasak ber khan goal 20 chhuah turin match 44 a mamawh. 

•    January 2019-a Manchester City an ngam loh hnuah Liverpool hi Premier League-ah an la tlawm leh lo a, hetih chhung hian Tottenham chu vawi thum tawngin an hneh vek - Spurs hi league match 16-ah an tlawm tawh thung. 

•    Tun season-a a vawi khat nan Premier League match-ah a zawnin Spurs an tlawm a,  May 2019 khan a zawnin an lo tlawm tawh bawk. Jose Mourinho tan August 2018-a Manchester United a enkawl laia a zawna a tlawm hnua Premier League-a a zawna a tlawm lehna hmasa ber a ni bawk. 

•    December 2006 (7) hnua a vawi khat nan Liverpool-in Premier League match rukah clean sheet an nei. 

•    Firmino-a'n Liverpool tana a match hnuhnung parukah goal nga a khung a, hemi hmaa Reds tana a match hnuhnung 30-ah goal nga a khung.