Vawiinah NECS Cup 2017 Final ; Bawngkawn hmaah Chhinga Veng

Bawngkawn leh Chhinga Veng te chuan vawiin chawhnu dar 2:00 hian NECS Cup 2017 nomawi an inchuh dawn.

ADFA buatsaih Aizawl District chhunga khua leh veng football inelnaa team hmuhnawm pahnih tan supporter neih ṭhat chu inelna pakhat a tlin dawn avangin, Lammulah mipui an pungkhawm hnem ang.

Final-a inhmachhawn tur Chhinga Veng leh Bawngkawn hian nomawi an la chawi ngai lo a, amaherawhchu champion turin player an nei ṭha ve ve a, ṭantu pawh an nei ṭha a, inkhel en man hi Rs 30 chauh a ni.

Si sarih maw...
Chhinga Veng hian quarter­final match hmasa berah Bawngkawn 7-0 in an sawp a, final en loh phah nang hmang suh. Hemi phenah hian chhan ṭha tak a awm.

Bawngkawn manager H. Lalawmpuia chuan (Maawma) chuan, "Kan inkhelh hmasak dawn khan khelmual kan lut ṭep tawh tihah kan player pawimawh pahnih H. Lalmuankima leh Lalnuntluanga kan chhawr thei dawn lo tih ka hre chauh a, kha thil khan player dangte pawh a nghawng hle. Tunah chuan kan ṭhat theih dan takin kan khel tawh dawn a, tlukna ngaiah tluk nawn kan tum lo," tiin inring­tawk takin Vanglaini palai a hrilh.

Midfielder Lalnuntluanga hian semifinal-a Ramhlun South an hneh ṭumin chakna goal a khung a, winger H. Lalmuankima chu man of the match atana thlan chhuah tur khawpin a khel ṭha bawk. Tluanga leh MK-a te hi Aizawl FC player an ni a, I League khel tlak player hi veng inelnaah danglamna an ni pha ang.

Bawngkawn forward MS Dawngliana chanchin hi Chhinga Veng lam hrilh nawn a ngai lo a, MPL5-a Chhinga Veng FC chhuanvawr a ni tlat. Amaherawhchu Bawngkawn hian hrem vangin defender Liansiama an chhawr thei dawn lo a, defender tawnhriat nei ṭha Ronald Zothanzama an ziak lut lo chu pawi an ti khawp ang.

A chiang lo?
Khelh sarih aṭanga goal 36 khung thei Chhinga Veng tan khawi team lakah mah goal khung a huphurhawm lo ang. Striker goal 14 khung tawh Vanlallawma khelhna team hian 7-0 a an sawp tawh team an hlau dawn lo tih chu thil chiang a ni.

Mahse, Chhinga Veng coach H. Lalremruata a ṭawng uang duh lo a, tualchhung football tana mi ṭangkai Remruata chuan, "Football-ah chuan chak chiang sawi theih a ni lo, kan inkhel tawk hle ang tih ka ring. Chutih rualin Pathian leh veng mipuite puihna zarah hnehna chan theih ngei erawh kan beisei," tiin Vanglaini palai a hrilh.

Remruata chuan, ''Goal ven nan chuang khingpui te na taka nawr a ṭha a, chumi tur chuan theihna kan nei a ni," tiin a tlar hma player-te chungah an inghah thu a sawi.

Bawngkawn ang thoin Chhinga Veng hian an defender rinrawl Zomuanpuia hrem vangin an chhawr thei dawn lo a, amaherawhchu final-ah hian MPL-ah pawh rinrawl ni pha K. Lalthlahlova a lo kir dawn thung.

Champion thar
NECS Cup vawi li khelh tawhah Ramhlun South vawi hnih an champion tawh a, Armed Veng leh Bethlehem Vengthlang te vawi khat ve ve an champion tawh a, vawiinah champion thar an awm ang.

Bawngkawn leh Chhinga Veng hian tlarhnung aiin an tlarhma player-te an chhuang a, hei hi vawiin final hmuhnawm chhan tur ber a ni.

FINAL KALKAWNG
CHHINGA VENG
Second Round
Chhinga Veng 13 - 0 Lungverh
CHH : Vanlallawma 11', 31', 47', 68', 74', 78'; Lalsawmzela 15'; Isaac Lalremruata 24'; Vanlalthanga 52'; Vanlalawia 58'; F. Lalnuntluanga 66'; Lalremtluanga 68'(OG); Lalthlamuana 72'
Round of 32
Chhinga Veng 0 - 0 Ramhlun Venglai
Penalty shootout-ah Chhinga Veng 3-2 in an chak Last 16
Luangmual 1 - 7 Chhinga Veng
LUA : Lalruatkima 80'
CHI : Rochharzela 6'(P), 43'; Paul Ramfangzauva 20', Vanlallawma 27', Lalthlamuana 72', Lalsawmzela 75', F. Lalnuntluanga 88'
Quarterfinal
Chhinga Veng 7 - 0 Bawngkawn
CHI : Rochharzela 25', 38', 73'; Vanlallawma 41', 68'; Malsawmzuala 45'; Lalnunmawia 89'.
Sihphir Venghlun 1 - 1 Chhinga Veng
SIH : Samuel Lalchhandama 83'
CHI : Vanlallawma 21'
Chhinga Veng 7 - 0 Electric Veng
CHI : Vanlallawma 38', 57', 66'; Rochharzela 44', 59', 78', 83'
Semifinal
Chhinga Veng 1 - 1 Thingsulthliah
Penalty shootout-ah Chhinga Veng 4-2 in an chak
CHI : Vanlallawma 74'
THI : Isak Vanlalruatfela 22'
BAWNGKAWN
Second Round
Bawngkawn 2 - 0 Khatla South
BAW : Lalnuntluanga 34'; Immanuel Malsawmthara 61'
Last 32
Republic Vengthlang 1 - 1 Bawngkawn
Penalty shootout-ah Bawngkawn 4-2 in an chak.
REP : Lalsangzuala 7'
BAW : Lalṭhakima 68'
Last 16
Chawnpui 1 - 3 Bawngkawn
CHA : David Laltlansanga 45+2'
BAW : MS Dawngliana 15'(P), 31'; Lalṭhakima 88'
Quarterfinal
Chhinga Veng 7 - 0 Bawngkawn
CHI : Rochharzela 25', 38', 73'; Vanlallawma 41', 68';
Malsawmzuala 45'; Lalnunmawia 89'
Bawngkawn 1 - 0 Electric Veng
BAW : Immanuel Malsawmthara 83'
MOM: Immanuel Malsawmthara, Bawngkawn
Sihphir Venghlun 0 - 3 Bawngkawn
BAW : MS Dawngliana 5'; Lalremruata 81'; H. Lalramsanga(OG) 89'
MoM : MS Dawngliana, Bawngkawn
Semifinal
Ramhlun South 2 - 3 Bawngkawn
RAM : Vanlalthlamuana 14'; R. Lalthanmawia 80'
BAW : Lalṭhakima 15'; Emmanuel Malsawmthara 60'; Lalnuntluanga 78'
MoM : H. Lalmuankima, Bawngkawn