Chanmari leh Mission Veng inlan hun

Chanmari Hollow BBSP-in zanin dar 7:00 hian Hawla Indoor Stadium-ah Mission Veng Vikings an hmachhawn dawn. Mizoram Super League club kai thar Hollow tan zanin hi hnehna chan theihna hun ṭha a ni.

Vikings an hliam

Mission Veng Vikings-in an match hmasa berah Zar­kawt Serpents lakah hnehna an sual chhuakah an inngai a, amaherawhchu MSL awm hnua an hnehna chan ropui ber anga ngaih chu MSL Board leh Technical Committee chuan engmah lo maiah an chantir. Zanin hian Vikings-in bul an ṭan ṭha leh dawn a, an rilru put hmang a hriat chiah ang.

Vikings hian India ram huap pawha player ṭha Rikin Pethani chu chah luh turin an be fel tawh a, amaherawhchu feet ruk leh inches kuaa sang player hian Hollow a hmachhawn thei dawn lo. Mission Veng tan hnualna tur a ni chuang lo - Michael F. Lalawmpuia bakah Moses Zoremmawia leh Lalrina Renthlei ten an khelh ṭhat zan an tawng a nih phawt chuan dan rual an ni lo ang.

Mission Veng Vikings coach Reuben Lalchhandama chuan, "Player an dam ṭha a, training-naah an thawkrim a, an chevel hmuh a nuam bawk. Hnehna chan leh chan loh chu eng pawh ni se Hollow hmachhawn tur hian kan inpeih. Tun hnaiah referee an sawisel nasa a, kei erawhin ka pawm lo - an ham ṭha ka ti. Team tin hian inzir kan mamawh a, kan referee neih ṭhat ber te thutlukna hi kan pawm tur a ni," tiin Vanglaini palai a hrilh.

Hollow ṭha zawk

Chanmari Hollow-in an match hmasa berah cham­pion lai Khatla TBL an elpha a, an hneh lohna chu point hnih chauh a ni. Amaherawhchu hun tawpa point hniha danglamna hi tlem viau angin lang mah se hetiang hlira an kal a nih chuan relegation playoff chu an chan tur a ni.

Hei vang tak hian zan­in hian Vanlalṭhazuala, Lalnun­puia Renthlei leh Lalhma­chhuana te an pawimawh lehzual dawn a, state pawn player la chah thleng lo Vi­kings laka hnehna an chang lo a nih chuan semifinal lut turin kawng harsa zawk an zawh a ṭul ang. Coach Sa­muel Lalthlamuana chhawr theih zingah Mohit Bhadu a awm a, Dehradun tlangval hian match hmasa ber a khelh hnuah training a zawm ṭhat avangin a theihna tak a pholan theih tawh beisei a ni.

Chanmari Hollow mana­ger Jerome VL Hriatpuia chuan, "Chak kan tum a, chumi tur chuan theihtawp kan chhuah ang. Vikings hian state pawn player an la chah thleng lo niin kan hria a, an rawn thleng ta a nih pawhin chumi hmachhawn tur chuan kan inpeih a ṭul a ni," tiin an inbuatsaihnaah a lungawi thu a sawi.

Mipui ṭangkaina sawi langin Hollow assistant coach Lalrammuana Sailo chuan, "Mipui te hi kan chakna hnar an ni a, TBL nen pawha kan khelh ṭhatna chhan kha chu mipui an ni. Social media Facebook leh Instagram-ah pawh Hollow ṭantu an pung zel a, Hawla Indoor Stadium-ah pawh ṭawiawmna ṭha tak kan dawn leh ngei kan beisei a, chumi tur chuan min ṭantute kan sawm bawk," tiin Vanglaini palai a hrilh.

Team Dinhmun
# TEAM Pld W L Pts GF GA GD
1 Tuikual South BC 2 1 1 3 173 151 22
2 Khatla TBL 1 1 0 2 69 67 2
3 Zarkawt BCA 1 1 0 2 89 87 2
4 Chanmari Hollows 1 0 1 1 67 69 -2
5 Zarkawt Serpents 1 0 1 1 62 86 -24
6 Mission Veng Vikings 0 0 0 0 0 0 0
Note : MSL-ah hian chak zawk an awm zel a, a chak zawk hian
point hnih hmuin a chak lo lamin point khat an hmu thung.