Brazil hlim niah Argentina an ṭap
World champion vawi nga ni tawh Brazil chu 2018 FIFA World Cup khel tura inpet kai hmasa ber an ni. South America World Cup Qualifier inkhelah Tite naute hian nimin zing khan Paraguay 3-0 in an hneh a, Argentina erawh captain Lionel Messi hrem a nih an hiat hnu lawkah Bolivia 2-0 in an hneh lo.
Brazil nge nge...
Corinthians Arena, Sao Paulo-a inkhelah Brazil hian Liverpool midfieler Philippe Coutinho chuan Reds tana a tih fo tawh angin minute 10-na lekah box pawn aṭangin goal hmahruai a khung.
Captain Neymar-a'n penalty a hlah hnuah a tihsual a siam ṭha. Barcelona forward hian halfway line hmalam aṭangin chak taka ball tlan puiin an goal hnihna a khung a, kum 25-a upa Neymar tan ram tana a goal 52-na a ni. Inkhel thununtu Brazil-in Real Madrid defender Marcelo hmangin hun tawp dawnah an goal thumna an khung leh bawk.
Brazil hian Dunga kaihhruaina hnuai an ramah FIFA World Cup 2014 an khel a, an tual zawlah ngei Germany chu 7-1 in an ngam lo a, an goal neih chhun pawh hun tawp hma hreta Oscar-a khung a ni. Football thiam ram tan an thil tawn hi chhiatna tawp a tling.
Brazil-in an dinhmun chhiatzia an hria a, hmasawn an tum. Rio Olympic-ah a vawi khat nan mipa football inelnaah gold medal an dawng. Nikum September thla khan Dunga banin Tite an lalut. Kum 55-a upa Tite kaihhruaina hnuaiah tun hnai an match hnuhnung pakuah hnehna an chang fai vek - World Cup khel tura tling hmasa ber nih hi an phu.
Qualifier khelh hmabak match li la awmah Brazil hi chak lo vek pawh ni se table-a palina aia hniam an ni thei tawh lo; Brazil an tlin lai hian Bolivia leh Venezuela tan Russia pana kawng a ping thung. Inkhel dangah World Cup khel tura beisei la nei Peru chuan Uruguay 2-1 in an hneh a, Chile chuan an mikhual Venezuela 3-1 in an hneh bawk.
Messi an hrem
Player ṭha rual awmkhawmna Argentina-in Copa America final-ah a zawnin Chile an hneh lo. Centenario final an khelh ṭumin Messi-a'n penalty a hlah a, an chak lo zui bawk.
March 22 zan khan Messi-a penalty chhuih luh hmangin Chile 1-0 in an hneh, World Cup qualifier table-ah Copa America champion hi Argentina chungah an awm chiah bawk.
Amaherawhchu, Chile an hneh ṭuma goal awmchhun khungtu Messi chuan ṭawngkam mawi lo takin assistant referee a ṭawng khum! Thawhlehni zan khan Argentina hi Bolivia khel turin an zin chhuak, inkhelh harsatna hmuna khelmual an luh hma darkar nga leh a chanve chauh a awm tihah Messi hremna hi a chhuak.
Barcelona star hi International match pali khel thei lo tur leh £8,100 (Rs 6,51,920.40) chawi tura tih a ni bawk. International match a chawlh san thu a puan hnua lo kir leh Messi inkhel thei lo tur hi an ram tan channa nasa tak a ni dawn.
World champion vawi hnih ni tawh Argentina hian qualifier khelh hmabak match li an la nei a, heng zingah pathumah Messi an chhawr thei dawn lo.
Argentina coach Edgardo Bauza-a'n an team chu player mala innghat an nih loh thu sawi lawk mah se Messi tel lo chuan Bolivia lakah an tlarhma a bil leh tlat.
La Paz-a inkhelah Bolivia tan Juan Carlos Arce leh Marcelo Martins Moreno ten goal an khung. Kum 2009 a si ruk faia an tlawm tawhna ramah Argentina an mualpho nawn.
Argentina hi tun dinhmunah match 14 khelh aṭanga point 22 hmuin table-ah pangana an ni a, an hnuaia awm Ecuador, Peru leh Paraguay ten an hlat loh bawk avangin Messi tel lohna Argentina hi an ngaihtuahawm hle.
Team Dinhmun
# Team Pld W D L GF GA GD Pts
1 Brazil 14 10 3 1 35 10 25 33
2 Colombia 14 7 3 4 18 15 3 24
3 Uruguay 14 7 2 5 26 17 9 23
4 Chile 14 7 2 5 24 19 5 23
5 Argentina 14 6 4 4 15 14 1 22
6 Ecuador 14 6 2 6 23 20 3 20
7 Peru 14 5 3 6 22 23 -1 18
8 Paraguay 14 5 3 6 13 21 -8 18
9 Bolivia 14 3 1 10 12 32 -20 10
10 Venezuela 14 1 3 10 17 34 -17 6