Australia hi ṭhian ṭha an ni tawh lo - Kohli

India captain Virat Kohli chuan test series boruak sang taka Australia an hneh hnu lawkah mikhual team player-te nena an inṭhian ṭhatna chu a tawp tawh thu a sawi. India hian test match hnu­hnung berah Australia hi wicket riata hnehin series hi 2-1 in an la a ni.

Team pahnih an inhmachhawn hma hian Kohli chuan Australia player-te chu a ṭhian ṭha vek an nih thu a sawi a, "Khelmual pawn lamah chuan Australian player-te nen hian kan inkawmngeih em em vek a ni," tiin a sawi.

Mahse, Dharamsala khaw­puia team pahnihin an test match hnuhnung ber an khelh hnuah Kohli hi Asutralia player-te nen ṭhian ṭha an la nih reng leh nih loh chungchang an zawt a, India captain chuan, "Tunah chuan engkim a inthlak tawh a, Australia player-te nen ṭhian ṭha kan nih thu ka sawi hi in hre tawh lo ang," a ti.

India leh Australia ten test series an neih lai hian Australia captain Steve Smith chuan lbw chungchanga thutlukna a siam dawnin dan phal loh angin dressing room lam puihna a dil a, hemi chungchangah hian Kohli chuan Smith chuan a tih loh tawp tur a ti a ni, tiin a lo sawi tawh.

Kohli hian test match thumna an khelh laiin a fielding-na lamah a darah hliam a tuar a, inkhelh zawh a nih hnuah India captain inhliam hi Australian batsman Glenn Maxwell chuan ngeiawm takin a ṭawngkhum nia sawi a ni. Kohli hian hliam vangin test match lina khelh theih loh chhunzawm mah se India hian hnehna an chang ta tho.

Dharamsala khawpuia test match linaah hian India all-rounder Ravindra Jadeja leh Australia wicketkeeper Matthew Wade te chu mawi lo takin an che a, he thil thleng hi India rama cricket thuneitu sang Board of Control for Cricket in India (BCCI) chuan a video-in an website lamah an tarlang!

Australia captain Steve Smith chuan, "Series khelh chhungin insum zawh loh chang ka nei ṭhin a, mawi lo taka awm chang pawh ka nei tih ka inhriat avangin ngaihdam ka dil a ni. Mahse, he ka tawnhriat aṭang hian ka inzir ang a, mimal mai piah lamah hruaitu ka nihna angin hma ka sawn ngei ka inring a ni," a ti.

Smith chuan BCCI-in Ravindra Jadeja leh Australia wicketkeeper Matthew Wade inkara thil thleng website lama an pholang chu ṭha lo a tih thu sawi nghalin, "Series khelh chhung zawngin khatiang boruak sang kha chu team pahnih inkarah a thleng reng a, khelmual chhunga thil thleng chu khelmuala hnutchhiah mai hi a ṭha ber a ni," tiin a lawm lo hle.