Rawlthar ngaihven hlawh Mbappe

A hming chu Kylian Mbappe a ni. AS Monaco striker Mbappe hi tun hnaiah chuan khawvela rawlthar duhawm berte zinga mi a ni a, French Ligue 1 club tan kum ṭha a hman mek avangin Europe club liante chuan an thlithlai uluk tawh hle.

Tu nge Mbappe?

Cameroon chhulchhuak Wilfried-a leh Algerian mi Fayza-i te fapa Mbappe hi December 20, 1998 khan Bondy, France-ah a piang. A pa hi football coach niin a agent a ni nghal a, a nu hi handball player hlui a nih avangin infiamna khawvel a luhchilh hi a mak lo, kawng dang zawh zawk chu ni se a mak zawk hial thei.

A pa Wilfried-a enkawl AS Bondy aṭangin football nun bul a ṭan a, player ṭha zawnga hmun tin dap kual ṭhin Real Madrid leh Valencia te chuan naupangte a nih lai hian an lo va hmu fuh tawh! Mahse, Mbappe hian Spanish club hausa lam a hawi duh lo, an ram club AS Monaco chu a senior career ṭan nan a thlang.

Mi bik

December 2, 2015 a ni a; Monaco chuan SM Caen an mikhual. Hun tawp nan minute hnih chauh a awm tawh tihin kum 16 leh ni 347-a upa Mbappe chuan Fabio Coentrao thlakin khemualah a rawn tlan lut - club tana inlan thei naupang ber record thar a siam.

Kum 1994 khan khatih hunlaia kum 17 leh ni 14-a upa Thierry Henry chu Monaco tana inlan thei naupang ber ni turin a lo inlan tawh a, Arsenal legend nita Henry record hi Mbappe-a'n a rawn khum.

Feet 5 leh inches 10-a sang Mbappe hi February 20, 2016 a Monaco-in Ligue 1 inkhela Troyes 3-1 a an hneh ṭumin a hmel a lan a, he inkhela goal hnuhnung ber hi hun tawp hamrik rik ruala Mbappe khung a ni.

Monaco tana a goal hmasa ber a khung hian Mbappe hi kum 17 leh ni 62-a upa chauh a la ni a, he club tana goal khung thei naupang ber Henry-a record bawk a rawn khum leh. Nikum March thla khan Mbappe hian a professional contract hmasa ber chu kum thum chhung atan a ziak a, kum 2019 June thla thleng Monaco tan contract a nei mek.

A pian phung a dik a, a fingin a tlanchak bawk; striker ṭhain an neih tur leh mamawh ang hi amahah hian a kim a ni ber. France rawlthar khelh dan hi Henry khelh ṭhin dan nen a inan deuh avangin khaikhin pawh a hlawh a, an chawr chhuahna club a inan bawk avang leh an hunlai a record siam thei khawpa theihna nei ṭha bik an nih avangin an khaikhin vel hi a mak lo.

Hei le Mbappe

Mbappe-a'n a senior career china a hattrick hmasa ber chu December 14, 2016 khan Stade Louis-ah French League Cup last 16-a Stade Rennais F.C. 7-0 ngawta an sawp ṭumin a siam.

Goal khung tur bika piang ni hiala ngaih Mbappe hian kumin February 11 khan FC Metz 5-0 a an sawp ṭumin goal thum a khung leh - Ligue 1 match bika a hattrick hmasa ber a siam hian kum 18 leh thla hnih chauha upa a la ni. French football inelna sang bera hattrick siam thei naupang ber kum 17-a upa Jeremy Menez chiah chu a tluk loh a ni.

Ligue 1, French Cup leh French League Cup lama hming a chher hnuah Mbappe hian a la duhtawk lo a, club lian leh ṭha bikte inelna European competition lam a hawi nghal - a bul ṭanna chu Premier League club hausa, khawvela manager hlawh hnem ber Pep Guardiola enkawl Manchester City a ni!

Kumin February 11 khan Champions League last 16 first leg khel turin Monaco hi Etihad Stadium-ah an lenglut, Ligue 1 club hi 5-3 in an tlawm haw. Chak lo mah se, Mbappe tan hun chhinchhiah tlak a nih loh phah chuang lo; minute 40-naah Fabinho-a long ball pet chu Mbappe hian City goal-ah a hlap lut - Karim Benzema tih lohah chuan France player zinga Champions League-a goal khung thei naupang ber a ni leh nghal pang.

Spanish manager kaihhruai Man City hi 5-3 a hmahruai chungin second leg khel turin Stade Louis II-ah an lenglut. Minute 8-na lekah Bernardo Silva cross chu hnai set sawt aṭangin Mbappe-a'n khungin an club beiseina a chhem nung. An mikhual hi 3-1 a hnehin inkhel pahnih belhkhawmah 6-6 a ni a, away goal rule hmangin Monaco an tlang - City tlarhnung hian Mbappe chu an hrechiang ang.

Club tana a chet ṭhat avangin France tan World Cup qualifier khel turin koh zui a ni a, March 26 zana Luxembourg 3-1 an hneh ṭumin minute 78-naah Dimitri Payet thlakin khelmualah a lut, kum 18 leh thla thuma upa chauh a la nih avangin an ram tana khel thei naupang pahnihna a ni.

Real an ri e...

France ram aṭangin player ṭha bik a rawn chhawr chhuak mek a, khawveal club zinga player lei huai bera ngaih Real Madrid chuan thawm an nei nghal. A hun laia khawvel player manto ber ni phak Cristiano Ronaldo leh Gareth Bale te leitu club-in thawm an nei hi a mak lo. Spanish club lian hian tun hma aṭang tawhin an mit it zawng an hlah ngai meuh lo.

Real Madrid captain Sergio Ramos chuan, "Kan club president Florentino Perez hnehnah lalut turin ka ti a ni hran lo. Mahse, player ṭhe bik tan chuan Real Madrid kawngkhar hi a inhawng reng. Mbappe, kan hnehnah i rawn kal a nih chuan midang kan lawm luh ang bawkin kan lo lawm ang che," tiin a sawi.

Kum 18-a upa Mbappe hian tun season-ah a club tan inelna hrang hrangah match 32 a khelh aṭangin goal 19 a khung tawh a, a ṭhiante goal khung tur vawi 11 a siam sak tawh bawk. Monaco chu league hmahruaitu nih puiin Champions League quarterfinal an lut tawh bawk.

Khawthlang thuthar thedarhtu ṭhenkhat chuan Mbappe man zat tur an inrinsiak leh der tawh, media tam tak chuan France rawlthar duhawm hi pound maktaduai 130 aia tlawm a nih an rin loh thu an sawi. Mbappe nena sawi zawm zingah Real Madrid bakah hian an elpui Barcelona, Manchester United leh Arsenal te chu hming langsar an ni.