Phengphehlep an par chhuak ta

Mizoram Super League Season 3-ah Tuikual South-in chak hmel hmuhna hmasa ni turin Zarkawt Serpents chu March 28, Thawhlehni zan khan 86-62 in an sawp. Tuikual South-in harsatna an tawh laiin an veng tlangval F. Zodinthara'n mawhphurhna a la a, mipui ṭawiawmna ṭha tak hnuaiah Punjabi tlangval Amjyot Singh-a'n lawm a hlawh viau bawk.

Thu lawmawm bawhzuina

Zarkawt Serpents-in an match hmasa berah Mission Veng Vikings an hneh lo a, amaherawhchu MSL Board leh Technical Committee-in chanchinṭha an thlen sak. Serpents hian Tuikual South an hmachhawn hmain point la hmu lo mah se thuneitu thutlukna zarah match la khel lo ang an ni a, state pawn player Vikings nen rematch an khelh dawn avangin semifinal khelhna kawng a inhawng zau leh sawt.

Serpents-in Robert Lal­fakzuala leh Sahil Sharma te hmangin Tuikual South lakah bul an ṭan ṭha a, inhliam vanga Vikings hmachhawn thei lo Lalsangkima Ralte-in a thiamna a lantir bawk avangin first quarter-ah ro an rel. TKS leh Zarkawt club inthlauhna hi point 11 zet a ni.

Treble champion tum?

Tuikual South-in MSL3 ṭan hmain Season Opening Tournament leh MBBA Cup-ah te nomawi an chawi a, state pawn player an nei lo. Tunah chuan Amjyot Singh leh Pal­preet Singh Brar te an nei tawh a, court chhungah treble cham­pion an tum tih an lantir bawk.

Serpents nen TKS coach KC Lalliantluanga'n Mizo hlanga inkhel bul ṭan a thlang a, bul ṭan fuh tawk lo mah se Mizo player-te'n inrintawkna an neih phah. Second quarter aṭangin Phengphehlep dang­lamna a lang ṭan a, amaherawhchu first quarter-a an chet chhiat em avangin halftime-ah Serpents point khatin an la sang tho.

Third quarter-ah Amyjot-a'n a sanna hmangin a dunk a, Punjabi tlangval hian a thiamna hmangin 3-points thlenga a luh theih bawk avang­in Serpents tan dan ngaihna a awm lo. Tuikual South tan captain Dina leh Lalfakmawia ten tlarhnung an puih ṭhat bakah point an nei ve zel a, hun a tawp meuh chuan harsatna nei loin an chak.

Danglamna mipui

Hun tawpa Tuikual South leh Serpents inthlauhna chu point 24 a ni a, Phengphehlep danglamna chhan chu mipui an ni. Zarkawt club-in ṭantu an neih ṭhat tawk loh laiin Tuikual South erawhin player tiphur turin thawm an siam a, hnehna an chan chhan hi Amjyot ringawt a ni lo - mipui vang a ni.

Tuikual South manager Lalremsiama Hrahsel chuan, "A bul leh a tawp chu Pathian a ni a, player-te thawhrimna leh fan-te ṭawiawmna ṭha kan chak pui bawk. Tuikual South ṭantute chungah kan lawm tak meuh meuh a ni," tiin an chakna chhanah mipui a dah pawimawh hle.

Serpents QTR Tuikual South
18 1ST 7
17 2ND 27
35 HT 34
11 3RD 26
16 4TH 26
62 TOT 86
Mimal Che Ṭha
Serpents Tuikual South
Score
Sahil 12 Amyjot 27
Robert 10 Dina 20
LR Junior 9 Fakmawia 10
Rebound
Sahil 9 Amyjot 12