An khuaah Ronaldo chak lo

Cristiano Ronaldo chu a seilenna Portugal huam chhunga thliarkar pakhat Madeira-ah a vawi khat nan ram tana inlanin goal khung mah se Sweden lakah Euro 2016 champion hi an chak zo lo. Real Madrid forward hian ram tana a goal 71-na chu minute 18-naah a khung a, Swede defender Andreas Granqvist chuan an lamah a ti lut bawk.

Portugal hi awlsam takin an chak mai dawn nia a lan hnuah mikhual team tan Vik­tor Claesson chuan goal hnih khungin an si phurh a sut zo a, Portugal right back Cavaco Cancelo chuan injury time-ah an lama ti lut ve leh bawkin Sweden hian 3-2 in hnehna an chang ta zawk a ni.

Ronaldo chawimawina

Kum 32-a upa Ronaldo hi Madeira khawpui ber Fun­chal-a piang a ni a, Madeira sorkar chuan an chhulchhuak tlangval hi chawimawi duhin Madeira Airport chu Cristiano Ronaldo Airport tiin an thlak dawn a, an thlawhtheihna ṭum hmun hming thlakna hun hi nimin khan hman a ni.

Madeira sorkara an presi­dent Miguel Albuquerque chuan, "Ram pum huap lawm­na chuan rei a daih lo ṭhin a, Madeira hlimna erawh chu­tiang a ni ve lo," tiin khawvel hriata an ram chawi lartu Ronal­do chu an hriatreng thu a sawi.

Ronaldo hminga an ram airport thlak tur a nih chung­changah hian khawtual politi­cian ṭhenkhat chuan dodal viau mah se kaltlangpui a ni ta tho a, Funchal khawpui chuan Ronaldo hming hian museum leh hotel complex hial nei tawhin a lim an din bawk.