Zverev hneh loin Wawrinka a tla

Andy Murray leh Novak Djokovic ten hliam vangin Miami Open an khel thei lo, world number 1 leh 2 an inlan loh avangin Stan Wawrinka chu seeded pakhatna a ni. Swiss tlangval Wawrinka hi Thawhlehni zan khan Alexander Zverev hneh loin last 16 aṭanga vuak tlak a ni.

German rawlthar Zverev-a'n world number 3 Wawrinka lakah darkar khat leh minute 14 chhungin 4-6, 6-2, 6-1 in hnehna a chang. Kum 19-a upa Zverev hian set hmasa ber hloh mah se game hnuhnung 15 zinga 12 zet lain set hnuhnung pahnih a la.

Nikum September thla khan world number 20 Zverev hian a ATP tilte hmasa ber chu St Petersburg Open-ah a lo chawi tawh, hemi ṭum hian Wawrinka bawk hi a hneh. ATP World Tour Masters 1,000 bikah chuan Zverev tan a quarterfinal hmasa ber a ni dawn; David Goffin hnehtu Nick Kyrgios a hmachhawn leh ang.

Inkhel dangah Grand Slam vawi 18 champion tawh Roger Federer chuan Roberto Bautista Agut lakah 7-6 (7-5), 7-6 (7-4) in hnehna a chang. Swiss star hian kuminah match 16 hnehna a chang tawh, vawi khat chiah chak loh a la nei. Federer hian 6-3, 7-5 a Adrian Mannarino hnehtu Tomas Berdych chu zanin dar 7:30 hian a hmachhawn zui leh dawn a ni.

Kum 30-a upa Rafel Nadal pawhin a vawi khat nana Miami Open nomawi chawi a tumna a chhawm nung zui zel. Spain tlangval hian Nicolas Mahut chu 6-4, 7-6(4) in a hneh, semifinal lut tur chuan khawtual tlangval Jack Sock a paltlang leh a ngai dawn.

Last 16 inkhel dangah Kei Nishikori chuan Federico Delbonis lakah 6-3, 4-6, 6-3 in hnehna a chang ve bawk. Japan star hian nikum khan final a lut a, khatih laia world number 1 Djokovic hneh loin pahnihna a ni. Kum 27-a upa Nishikori hmachhawn turin Fabio Fognini chuan Donald Young 6-0, 6-4 in a lo hneh ve bawk.