France ngam loh Spain leh video technology!
Thawhlehni zan khan France chuan friendly match-ah Spain an mikhual a, an mualah 2-0 in an tlawm. Paris khawpuia inkhelah hian video technology hman a ni a, a ṭangkaina hmuh turin a awm nghal - video technology hman a ni hi Spain lawmah a tla ngei ang a, France tan erawh lawm 'lohna' tur a ni thung.
France tan forward chhuanvawr Antoine Griezmann chuan a goal khung lawm hman mah se referee-in video assistant a rawn hnuah pawmsak a ni lo a, Spain tana Gerard Deulofeu goal khung chu linesman-in offside phar mah se video assistant-in Everton aṭanga Milan tana loan-a khel mek midfielder goal khung hi a pawmsak.
Inkhel chu
France-in an khelmual hmanthiam leh chhuanvawr Stade de France-ah khawvela team ṭha ber pawl Spain an mikhual a, chawlhlawk hman a nih hmain goal hmuh tur a awm lo. Second half ṭan aṭanga minute hnihna lekah Griezmann-a'n goal a khung a, Atletico Madrid forward goal khung lawmin player leh fans an lam nasa hle - mahse, khelmual chhunga match official-te hmuh loh hmutu video assistant a awm a, Griezmann goal khung tur siamsaktu Layvin Kurzawa chu a offside tih referee a hrilh avangin he goal hi pawm a ni leh lo.
Spain-in an vanneihna chhawr loh an duh lo. Minute 68-naah Laurent Koscielny a chesual a, Arsenal defender hian Deulofeu a tih tluk avangin penalty a chawi. Spain tan David Silva a lo pen chhuak a, Manchester City midfielder hian an hmahruaina goal ni turin goalkeeper Hugo Lloris a bum chiang hle. Minute 77-naah Spain-in goal an khung chhunzawm a, Jordi Alba cross chu substitute Deulofeu-a'n an goal hnihna turin a khung. Barcelona youth system chhuak midfielder goal khung hi linesman-in offside phar mah se video assistant a inrawlh hnuah goal-a pawm a ni.
Video technology?
Thawhlehni zan inkhela hman Video Assistant Referee (VAR) hi enchhin mek a ni a, FIFA president Gianni Infantino chuan World Cup Russia 2018-ah hman ṭan a duh thu a lo sawi tawh. September friendly match-a Spain-in 3-1 a Italy an hneh ṭum khan VAR hi hman a lo ni tawh a, Thawhlehni zan inkhelah pawh hian ram pahnih rem tihnaa hman a ni.
France coach Didier Deschamps chuan, "VAR khan dik takin thutlukna a siam a, engah nge kan hman zel loh ang? Kan khelh dan kha min tibuai deuh tih chu zep rual a ni lo a, zaninah chuan kan tawrh phah tih hmuh turin a awm. Mahse, thil ṭha duh chuan a tuartu kan awm a ṭul a, midang pawhin an la hmachhawn ve tho a ngai dawn a ni. VAR hi football hmasawnnain a ken tel a ni a, kan pawm mai tur a ni," tiin an chak loh chhuanlamah video technology puh a tum lo.
VAR hi FIFA Club World Cup-ah khan hman a lo ni tawh a, Football Association chuan season tharah chuan FA Cup third round aṭangin VAR hi hman an tum tawh bawk.
Lopetegui a hlim
Spain coach Julen Lopetegui chuan, "VAR vanga chak kan ni lo a, ka naute khelh dan leh rilru puthmang vanga hnehna chang kan nih avangin ka hlim a ni," a ti a, "France hian player hmabak nei eng tak tak an kawl nual a, khawvela team ṭha ber pawl an ni tihah hian inhnialna tur a awm lo," tiin an khingpui a fak chhunzawm bawk.
Deschamps-a naute tan hian rawlthar duhawm Kylian Mbappe chuan inkhel bul a ṭan a ni.
Lopetegui chuan khel ṭha tak Deulofeu fak chhunzawm nghalin, "Deulofeu khan a luh rualin game a thlak danglam nghal a, player theihna nei ngah tak a nih avangin a khelh danah khan kan lawm takzet a ni. A rilru puthmang pu reng chunga hmasawn lam a pan zel chuan zanina a game khelh ang khan a hmuak nasa a ni," tiin Everton midfielder chu hmabak nei eng tak a nih thu a sawi.