Pliskova leh Wozniacki an tlang

Miami Open khelh mekah Thawh­leh­ni zan khan Karolina Pliskova leh Caroline Wozniacki te chuan an khingpui ve ve hnehin semifinal an lut a, player pahnihte hian zanin dar 7:30-ah final hmunruak an inchuh zui ang.

Seeded pahnihna Pliskova hian Mirjana Lucic-Baroni chu 6-3, 6-4 in a hneh a, inkhel pakhat zawkah Wozniacki chuan 6-4, 6-3 in Lucie Safarova a hneh ve thung.

Kum 25-a upa Pliskova hian season duhawm a hmang mek, kuminah Brisbane leh Doha Open nomawi a chawi tawh - kuminah match 23 hnehna chang tawhin vawi thum a chak lo thung. Zanina a hmachhawn tur Wozniacki hi Doha Open final-ah a lo hneh tawh.