Max Verstappen a tlan fal zel

Formula 1 champion lai Max Verstappen chuan hma a hruai fal ta. Red Bull driver hian Azerbaijan Grand Prix-ah hnehna a chang a, a elpui ber Charles Leclerc a chesual thung; championship table-ah Verstappen chuan a dinhmun a sawhnghet ta hle.

Tun season intlansiak pariat an neih tawhah Max hian vawi nga ngawt hnehna a chang, point 15 hmuin a chung berah a awm. Intlansiak vawi hnih ngawt tlan tluan theih loh nei mah se, a dangah a chak hnem avangin a sang fal ta tho.

Ferrari driver Leclerc-a'n a hmasa ber aṭangin Azerbaijan GP-ah inelna hmachhawn mah se, khawl lam fel lohna avangin a tlan tluan thei lo. A elpui Verstappen nen an inkarah point 21 a awm ta, intlansiak pakhat leka danglam thei erawh a la ni.

A hmuhnawm
F1 season kal laiah hian Ferrari chu car nei chak ber an ni - hei chu team dang pawhin an pawmpui. An driver ten an tlan chakpui ber em, tih erawh zawhna awm thei a ni ang, qualifying lamah pawh Leclerc a tlan ṭha leh hle.

Ferrari driver hian a hmasa ber aṭangin inelna a hmachhawn a, mahse kawng kawi hmasaah Red Bull driver pakhat zawk Sergio Perez chuan a dinhmun a chhuhsak thei. Max erawh Leclerc hnungah a la tlan thung.

Red Bull lamin an car ke (tyre) ngai an hman laiin Ferrari lamin an thlak a, an duh leh beisei ang erawhin an chetṭhat pui lem lo. Leclerc bakah a teammate Carlos Sainz chu khawl lam fel lo vang bawkin a tlan tluan thei bik lo.

Leclerc chuan, "Dinhmun duhawm taka din tawh hnua chak loh chu a uiawm duh, a bik takin point kan hmu lo a nih chuan rilru a na zual ṭhin. Team lamin a tira thutlukna an siam kha chu a pawina ka hre lo.

"Mahse, a hnu lama thil thleng kha chu ka duh vang a ni tawh bik lo, khawl lam fel lona kan tuar ve ta zeuh zeuh, a rang thei anga kan chingfel a nih loh erawh chuan team dang hnungah kan awm ang," tiin insiamṭhat nghal a pawimawh thu a sawi.

Hamilton a hnung
Lewis Hamilton-a'n hun rei tak chhung Formula 1 a thunun a, season hmasa pawh khan champion turin a dinhmun a ṭha hman hle. Intlansiak hnuhnung berah pawh lap tawp berah Max-a'n a tlan pel a, nomawi a chhuhsak daih bawk.

F1 ngainatu tam tak chuan ropui zawkin kuminah Hamilton hi a rawn inlar an beisei. Mahse, amah leh a team Mercedes chuan tun thlengin beisei an la phak lo - intlansiak pariat an neih tawh chinah hnehna chan an la nei lo.

Azerbaijan Grand Prix-ah Hamil-ton hi palina a ni a, a chhe hran lo. Amaherawhchu, championship hmahruaitu Verstappen nen an inkar a zau takzet tawh a, atan nomawi beiseina la thamral lo mah se beisei san ngam a harsa tawh ang.

F1 car hi a sû (bounce) deuh theia siam a ni a, season kal laiah Mercedes chuan he thil hi an la hmang fuh hleithei lo. Hamilton chuan a taksa lamah harsatna a siam thu a sawi a, inelna a hmachhawn tawh chinah awlsam a awm loh thu a sawi bawk.

Britain tlangval Lewis chuan, "A theih chhung chu inelna hmachhawn ka duh, mahse ka taksa dinhmun erawh ngaihchan a ngai," a ti. Mercedes team boss Toto Wolff chuan tun kar tawpa tlan tur Canadian GP atan an driver dinhmun a chian loh thu a sawi ve bawk a ni.