Murray hnehtu Berrettini a champion

Stuttgart Open final-ah Matteo Berrettini chuan Andy Murray hnehin nomawi a chawi. Britian tlangval Murray hi a pum a na a, chak lo mah se grass court season erawh a hman chhunzawm theih a beisei thu a sawi.

Kum 35 mi Murray hi Pathianni zan khan 6-4, 5-7, 6-3 in a chak lo, chak lo mah se tun hnaia a khelh ṭhat avangin 2018 hnua a vawi khat nan world ranking sang zual 50 zingah a inhlangkai leh ta chiah.

Ruahman dan chuan tunkar chhunga khelh tur Cinch Championship-ah Murray hi a inlan chhunzawm ang, a taksa nawmsam loh vang hian a dinhmun erawh a chiang lo, nimin tlai thleng kha chuan a inhnuhdawh thu sawi a la awm lo.

Italian tlangval Berrettini chuan, "He hmunah hian champion tumin ka rawn kal, ka duh leh thil tum ka tih hlawhtlin theih avangin ka lawm. Amaherawhchu match tawp dan erawh duhthusam a ni vek lem lo," tiin Murray-a'n harsatna a nei chu pawi a tih thu a sawi.

Chak lo mah se beisei a la neih thu sawiin Murray chuan, "Natna khirhkhan a nih loh hram ka beisei, pum na hi chu tun hma pawhin ka nei fo tawh, enkawl dam a harsa lo turh ka ngai," tiin a sawi a, a dinhmun tak erawh endik chu a ngai dawn tho.

Grass court inelna lian ber Wimbledon chu June 27 aṭangin khelh a ni dawn, inbuatsaih nan hun a tam tawh lo hle. Season tir aṭanga Murray-a thil tum ber chu Wimbledon khelh a ni a, a inlan ngei theihna turin theihtawp a chhuah ngei ang.