India dinhmun a chiang dawn

AFC Asian Cup qualifier khelh mekah India chuan zanin dar 8:30 hian Hong Kong an hmachhawn dawn a, Blue Tigers hian hnehna an chan chuan Asian Cup 2023 khel turin an tling chiang ang.

India hian match hnih an khelh aṭangin point ruk an nei tawh a, zanina an hmachhawn tur Hong Kong nen hian an point hmuh zat a inang a, zaninah sang zawk nih an inchuh dawn - Blue Tigers-ah Mizo player an awm lo.

Group D inkhel dangah vawiin tlai dar 5:00 hian Afghanistan leh Cambodia an inkhel dawn bawk a, anni erawh beisei tur nei tawh lo ve ve an ni.

Tlin theih dan
Asian Cup 2023-ah team 24 an inel dawn a, team 13 chu round hmasa lamah Asia khawmualpuia football inelna sang ber khel turin an tling tawh a, hmun ruak 11 a la awm tihna a ni.

AFC Asian qualification third round-ah team 24 inelin, anni hian hmun ruak 11 hi an inchuh - team 24 hi group parukah ṭhen hran an ni a, group pakhatah team pali zel an awm.

Group hmahruaitu ṭheuh leh pahnihna zinga a ti ṭha zual panga chu Asian Cup khel tur hian an tling dawn a, India leh Hong Kong hi tling ve ve thei dinhmunah an ding mek.

India beiseina
Group D-ah India leh Hong Kong ten point ruk ve ve an nei mek a, Hong Kong-in goal difference an neih ṭhat zawk avangin hma an hruai mek - a tu zawk zawk pawh hi tlawm se, point ruk an la neih cheu dawn avangin Asian Cup khel tura tlin dunna chance a sang hle.

Team pahnih hi lo inhnehtawk ta se, goal difference ṭha zawk avangin Hong Kong-in hma an hruai chhunzawm ang a, an tlang chiang ang. Blue Tigers pawh point sarih an nei dawn a, point sarih an hmuh chuan an tlang ngei a rinawm.

India tan sawi buai theih miah loa tlin theihna chu chak a ni a, Kolkata khawpuiah an khelh dawn bawk avangin Blue Tigers tan hmahruaitu ni chunga Asian Cup inpettling theihna chance a awm.

A hming Chhetri
Kum 37 lai ni tawh mah se India tan Sunil Chhetri chu innghahna a la ni reng a, Bengaluru FC striker hian tun inelnaah pawh goal thum a khung leh der tawh - Hong Kong lakah pawh India innghahna a ni leh ang.

Chhetri hian ram tan match 128 a khelhah goal 83 a khung tawh a, ram tana la inkhel mek zingah Cristiano Ronaldo (117 goals) leh Lionel Messi (86) chiah international goal khung hnemah a phak lo a, a pumpuiah parukna niin, pangana Real Madrid legend Ferenc Puskás (84 goals) a hnaih ta hle.

Chhetri chuan inkhel tur thlirlawkin, "Hong Kong hi team ṭha tak an ni. Mahse, mahni muala khel tur kan ni a, fans tam tak hmaah kan khel dawn a ni," a ti a, tlang ngei a beisei.

Hong Kong hi
German club Mainz 05 pawh lo enkawl tawh, player a nih laia Norway tana vawi 27 inlan thei Jorn Andersen chuan Hong Kong a enkawl mek a, December 2021 khan enkawl ṭan ve chauhin, match liah vawi thum a chakpui tawh.

Hong Kong captain Huang Yang hi Sao Paulo academy-ah te pawh lo awm tawh a ni a, kum 38 mi defensive midfielder hian tawnhriat a nei ṭha hle.

Brazilian club Gremio aṭanga inzir chhuak Philip Chan Siu Kwan hi midfield-ah Hong Kong innghahna a ni leh dawn a, tlarhmaah striker Matt Orr hi ven bik a sual lo bawk ang.