World Cup khel tur kan hre kim dawn ta

Qatar-in World Cup a thlen dawn avangin thlasikah World Cup khelh a ni dawn a, November 21 aṭanga neih ṭan tur inelnaah hian ram 32-in world champion nih an inchuh dawn.

He thu buatsaih a nih lai hian World Cup khel turin ram 30 an tling chiang tawh a, nizan khan inter-confederation playoff hmangin Australia leh Peru ten hmun ruak pakhat an chingfel bawk - result kan hre hman lo.

Zanin dar 11:30 hian Costa Rica leh New Zealand ten inter-confederation playoff hmangin hmun ruak pakhat an inchuh ve leh dawn a, World Cup khel tur a hriat kim dawn.

Costa Rica hi CONCACAF third round-a palina nih vanga playoff khel tur an ni a, New Zealand hi Oceania champion an ni thung - zanin inkhel hi a hmuhnawm ang.

Paris Saint-Germain keeper Keylor Navas chu Costa Rica tana si ban nghak turin a inpeih a, mahse, New Zealand-in Newcastle United striker Chris Wood an neih avangin Navas tan hna a awlsam dawn bik lo.

New Zealand hian Serie A club Torino midfielder Matthew Garbett leh Serie A club Empoli left back Liberato Cacace te ho an kawl bawk a, captain atana West Ham midfielder hlui Winston Reid neitu an ni bawk.

Costa Rica tan ram tan match 116 inlana goal 24 khungtu Joel Campbell chu innghahna tur a ni dawn a, Everton midfielder hlui Bryan Oviedo leh an ram club Herediano defensive midfielder Yeltsin Tejeda te pawh New Zealand tana buaina thlen turin an ṭha tawk.

Kum 36 mi Bryan Ruiz hi a kum tam ve deuh tawh mah se innghahna tlak a la ni reng a, Fulham, PSV Eindhoven leh Sporting Lisbon tana lo khel tawh a nih avangin a tawnhriat ringawt pawh Costa Rica tan chuan a hlu ang.

FIFA World Cup qualification (inter-confederation play-offs)

June 13, Thawhṭanni Zan
Australia 11:30 PM Peru

June 14, Thawhlehni Zan
Costa Rica 11:30 PM New Zealand