KIYG football-ah Mizoram an champion

SBI Khelo India Youth Games 2021-ah Mizoram chuan football inelnaah gold medal an la a, final-ah Kerala 5-1 zetin an sawp.

R. Lalbulliana leh R. Lalthawmmawia-te kaihhruai Mizoram team hian Kerala hi group stage-ah 5-0 in an sawp tawh a, final-ah pawh harsatna an tawk lo. Mizoram hi champion lai an ni a, champion nawnin gold medal an humhim.

Tau Devi Lal Stadium, Panchkula-ah Mizoram tan Champhai rawlthar Laltlanzova (Zozoa) chuan hattrick a siam a, Saitual rawlthar V. Zothanpuia (Puipuia) leh Vairengte rawlthar Augustine Lalrochana ten goal khat ve ve an khung.

Final chu
Mizoram hian inelna ṭan phat aṭangin team ṭha ber an ni tih an pholang a, an match hmasa berah Kerala 5-0 in an sawp a, Goa 3-0 a hneh lehin semifinal an lut. Group match hnuhnung berah Punjab nen goal awm loin inhnehtawk mah se he inkhel hian Mizoram theihna a sawifiah lo.

Semifinal-ah Mizoramin Karnataka 4-0 in an sawp a, group lehlama hmahruaitu Meghalaya chu Kerala-in penalty hmangin an hneh. Final khelh hma hauhin Mizoram chu gold la tura ngaih an ni tawh a, manager R. Lalthawmmawia tan erawh gold medal an kawl hma chu engmah chiang a awm lo thung.

Final-ah Mizoram tan Zozoa a che ṭha a, darkar chanve pawh an khelh hmain Zohmingsanga cross chu a tauh goal. Halftime hmain Puipuia'n goal hnihna a khung a, Saitual rawlthar hian match hmasa bera Kerala an hneh leh semifinal-ah goal hmahruai a lo khung tawh bawk.

Second half-ah Zozoa'n Mizoram goal thumna a khung a, amaherawhchu Mizoram an inthlahdah zeuh avangin Kerala-in goal khatin an chhanglet. Mizoram tan hlauhthawn tur a awm lo a, Champhai rawlthar Zozoa'n cool zetin Kerala keeper a pet khum. Zozoa hian tun inelnaah goal ruk a khung a, Mizoram tana goal khung tam ber a ni.

Mizoram tan Augustine Lalrochana'n goal ngana a khung bawk a, final-ah meuh Mizoram 5-1 in an chak.

Sulhnu ṭha
Khelo India Youth Games hi kum 2018 aṭang khan neih ṭan a ni a, football-ah Mizoram hian sulhnu an nei ṭha hle - kum tin an la champion ziah a ni.

Inelna neih ṭan kum 2018 khan Under 17 football-ah an champion. Kum 2019-ah Under 17-ah beisei pha lo mah se Under 21-ah an champion a, hmeichhe team-in bronze medal an la bawk.

Kum 2020 khan Mizoram hi Under 17 inelnaah an champion leh a, final-ah group stage-a an hneh loh leh inelna thlengtu Assam an hneh.

Covid-19 vangin nikum khan inelna neih a ni lo a, chutih rualin kumin inelna hi Khelo India Youth Games 2021 tih a la ni tho a; Under 21 inelna neih a ni lo a, Under 17 inelna chiah kalpui niin hei pawh hi nikuma an kum tur anga chhiarin Under 18 ang an ni.

MPL U18 a ṭangkai
Mizoram Football Association-in hun chep tak karah kumin khan MPL U18 a buatsaih a, a rah sengtu chu Mizoram football a ni.

Mizoram manager Mamawia chuan, "Training kan nei a, Covid-19 vangin kan chawl leh phawt. Training kan neih leh hma hian MPL U18 a awm a, kan ṭhatpui. Kan player pawimawhte kha MPL U18-a che ṭhate kha an ni a, training kan neih leh pawhin MPL U18 khel kha chu an lo dang tawh hle," tiin MPL U18 awm chu lawmawm a tih thu a sawi.

Champion team-ah hian MPL U18 khel an awm nual a, chung zinga langsar chu Venghnuai FC champion puitu defender Laldanmawia a ni a, ani hi MPL U18 best player-a thlan a ni.

Team enkawltute hnuhma
Mizoram manager Mamawia hian kum 2003 khan Subroto Cup U14 leh U17-ah Buanthanga nen Mizoram team an champion pui a, Subroto U14 bikah hian kum 2013, 2015 leh 2019 khan a champion pui leh bawk.

Kum 2019-a an champion ṭum hian Mamawia leh tun ṭuma coach Lalbulliana te hi an inkawp a, kum 2010 Subroto Cup final-a Chandigarh an hneh loh ṭum pawhin an inkawp.

Champhai coach Bula hian kum 2007 khan Mizoram NCC team chu Subroto Cup-ah a champion pui a; India junior team-a Jeje Lalpekhlua trial tura MFA-in a tirh hmasak ber ṭuma Mizoram Junior team enkawltu a ni bawk - team enkawltu pahnihin sulhnu an nei ṭha hle.