Rudy tawpna Silver

Khelo India Youth Games-ah Lawngtlai tleirawl Rudy Lalhmingmuani chuan nimin khan light welterweight (60-63 kg) boxing final-ah Isha Gurjar, Rajasthan chu 4-1 in an hneh lo a, silver-ah a lungawi a ṭul.

Panchkula, Haryana-a inelna neihah Rudy hian pre quarterfinal-ah Khushi, Haryana a hneh a, quarterfinal-ah Komal Dhami, Uttarakhand hneh lehin semifinal-ah M Swetha, Tamil Nadu chu unanimous decision (5-0) in a hneh.

Mizoramin boxing inelnaah hian mipa panga leh hmeichhe pathum an hruai a, Rudy hi medal la awmchhun a ni. Mizo mipa boxer Zorammuana (Tuipui), Franky Vanlalruatpuia (Lunglei) leh Lalnunzira (Lunglei) ten pre quarterfinal an paltlang lo a, Mipa boxer Laldinsanga (54 kg) leh Vanlalhuala (80 kg) te quarterfinal-ah an chak lo.

Hmeichhe boxer dang pahnih Ruthi Lalhmingṭhai (Reiek) leh Naom Chinsangnuam (Chaltlang) ten quarterfinal thleng mah se semifinal an thleng lo bawk. Khelo India boxing-ah hian Mizo medal la awm nual tawh mah se gold medal la an la awm lo.

Mizoram manager R. Lalbiaksangi chuan, "Kan training ṭhat ber ṭum a ni a, silver medal kan la hi lawmawm viau mah se kan thawhrim dan ngaihtuahin hei aia che ṭha turah hian kan inngai. Chhuanlam siam kan duh lo nachungin khawlum hi danglamna thlentu a ni tih a chiang a, hetianga harsatna kan tawh loh nan hian khaw lumna hmun Tuirial leh Sairang-ah te hian Sports Training Centre te hi awm thei se a duhawm hle," tiin Vanglaini a hrilh.

Mizoram boxing team hi SYS coach pahnih R. Labiaksangi (manager) leh Lalfakzuala (coach) ten an hruai a ni.