India TT champion Jeho-a Mizoram tan gold medal a la

Jeho Himnakulhpuingheta chuan Khelo India Youth Games 2022-ah gold medal a vaw chhuak. Table Tennis inelna huangah Mizo rawlthar hian West Bengal aiawha inlan Ankur Bhattacharya chu (2-4) 11-9, 9-11, 11-8, 7-11, 7-11, 9-11 a hnehin a champion.

India number 1 pawh ni tawh Jeho-a hian 2020 Khelo Youth Games-ah khan Mizoram tan bronze (singles) leh gold medal (doubles) a lo la tawh. Kumtir lam khan Khelo India University Games-ah team hmingin bronze medal an lo la tawh bawk.

Panchkula, Haryana-a inelna neihah Jeho-a leh Ankur-a final khel a hmuhnawm, rualkhat zinga player ṭha bik inhmachhawn an nih avangin kal fal pawh a harsa. Game an inlak chhawk zak zak a, a rei hnuah defensive game khel thiam zawk a dingchang.

Game thumna aṭangin Jeho-a hian inkhel a thunun, game hnuhnung berah phei chuan fal takin a kal thei. Mahse, a khingpui hian a zawna point ruk ngawt hmuin a hnaihchilh a, 6-9 a nih laiin Mizo player hian time out a la.

An lo kir leh hnuah point chu hloh leh mah se, champion tura a mamawh point chu a hlap chhuak. Point hmuhnung ber hmu tur hian kawh zetin a hlap tla a, a khingpui tan dan ngaihna a awm lo; Jeho-a erawh lawm avangin chhuatah a tlu thung.

Champion tur hian quarterfinal-ah West Bengal mi Aniket Sen Choudhary chu 4-1 in a hneh a, semifinal-ah Delhi player Adaarsh Om Chhetri chu 4-2 chu in a hneh bawk, a hmaa ding apiang a hneh hmiah hmiah.

Mizoram tana medal tam tak la tawh Jeho-a chuan, "Mizo mipuiten min ṭan tih ka hria, hmun hrang hrang aṭangin duhsakna ka dawng. Kan inkhelhna hmunah ngei pawh min entu tam tak an awm, an chungah ka lawm takzet a ni," tiin Vanglaini a hrilh.

Mizoram Table Tennis Association pawhin Jeho-a lawmpuina thu an sawi. MTTA general secretary, tuna Table Tennis Federation of India a joint secretary ni bawk Sailoliana Sailo chuan, "Jeho-a lakah beiseina sang tak kan nei a, semifinal-a mi kha hautak ber tura kan ngaih a ni, chutihrualin final match kha kan beisei aiin an inkhel tawk.

"Mahse, amah hi fighting spirit nei ṭha leh taima em em a nih avangin Pathianin malsawmna a pe niin kan hria. Association pawhin kan theihna sang bera lawmpuina lo hlan pawh kan tum a ni," tiin Vanglaini a hrilh.

Khelo India hi khelh phak ringawt pawh a awlsam lo. TT bikah hian India ranking sang zual 13 an tling nghal a, mi pahnih tan wildcard pek a nih bakah a thlengtuin player pakhat an thawh thei, mi 16 chauhin inelna an hmachhawn avangin a hautakin champion a harsa takzet.