Man City-in Haaland an tlangzarh ta

Manchester City chuan Borussia Dortmund aṭanga an lakluh Erling Haaland chu nimin khan an tlangzarh. English club hian Norwegian striker manah hian pound maktaduai 51.2 an seng a, a hlawh hi kar khatah £385,000 vel niin Kevin de Bruyne te nen an hlawh zat a inang ang.

Kum 21 mi Haaland hian Borussia Dortmund tan match 89 khelin goal 86 a khung a, May thla khan Etihad Stadium a pan dawn tih a chiang tawh. Haaland hian July 1 aṭangin Man City hi a zawm ang a, kum nga daih contract a ziak a, June 2027 thleng daih a ni.

Haaland chuan, "Kei leh ka chhungte chuan tun hi kan ngaihlu hle. Man City inkhel hi ka en fo a, pui thei ṭhin lo mah ila an khelh dan hmang hi ka ngaisang hle. Chance ṭhahnem tak an insiam a, ka tan chuan duhthusam a ni.

"Squad-ah world class player an ṭhahnem a, Pep hi khawvela manager ropui ber zinga mi a ni bawk. Ka thil tum tihlawhtling turin ka awmna tur takah ka awmah ka inngai a, training zawm ka nghakhlel tawh hle," tiin a sawi. Haaland hi City captain hlui Alf-Inge Haaland-a fapa a ni.

Haaland hian Nations League-ah an ram Norway tan a khel mek a, Pathianni zan khan Sweden 3-2 in an hneh a, goal hnih a khung. Norwegian striker hian ram tan match 21-ah goal 20 a khung.