Pathumnaah Djokovic a tlahniam

Novak Djokovic tan season duhawm a la ni thei lo, tun kara world ranking chhuak thar berah Novak Djokovic hi pakhatna aṭangin pathumnaah a tlahniam. Kum tir lama tournament a khelh tam loh a la tuar chho zel.

Serbian star hi Daniil Medvedev chuan a awm hmun aṭangin a luah lan, pakhatna dinhmun a hloh chauh pawh a la ni lo - Alexander Zverev chuan pahnihna dinhmun a rawn luah ta bawk, insiamṭhat a mamawh ta hle.

Djokovic, Rafael Nadal, Roger Federer leh Andy Murray ten ranking an thunun ṭhin viau, kum 2003 November thla hnuah chuan ranking sang zual pahnihah anni player ṭha pali an lan loh vawi khatna a ni hial.

Tun hnai kum 18 chhungin Andy Roddick tih loh chuan Medvedev hi Djokovic, Nadal, Federer leh Murray te kara world number 1 ni thei awmchhun a ni. US Open nomawi pakhat chauh la nei mah se Medvedev a thlen chin hi sawi nep theih a ni lo.

June 27 aṭangin Wimbledon khelh a ni dawn. Grass court inelna lianah hian Russia leh Ukraine buaina vangin Russia leh Belarus player tel an phal dawn lo. Hei vang hian ATP leh WTA chuan ranking point a awm theih loh tur thu an sawi.

Wimbledon-ah ranking point a awm loh chuan, a tuartu tur chu champion lai Djokovic a ni. Champion lai tan point 2000 an neihsa humhim a ngaih ṭhin vang a ni a, tournament hmachhawn lo mah se inelna zawh hunah Novak leh Medvedev inkar hi a zau ngei ngei dawn.

French Open champion hlim Rafael Nadal chu palinaah a awm. Grand Slam vawi 22 champion tawh hi a ke phah hliam vanga enkawl mek a ni a, a chawlh chen tur a la chiang lo. Paris aṭanga Spain a pan hnuah kha chuan Wimbledon khelh a duh thu a lo sawi tawh.