PSG leh Poch inṭhen dawn

Paris Saint-Germain chuan an coach Mauricio Pochettino an ban dawn. Paris club hian thla 18 lek an rawih hnuah Poch hi ban turin thutlukna an siam tawh a, a hmun ruak luah tur erawh tih chian a la ni lo.

Argentina manager Pochet-tino hian season khat daih contract chu a la nei. Mahse, an beisei leh duh angin a naute a hlawhtlinpui tam tawk lo a, an duh ber Champions League-ah an champion loh bawk avangin a tuar.

Zinedine Zidane, Jose Mourinho leh Nice coach Christophe Galtier te chu Poch thlak thei tura hming lam rik an ni. Club thuneitu lamin a cham dawn, tiin sawi mah se manager an ban dawn ta zawk a, a hmun ruak luah tur tan pawh mahni inringtawk tak nih a ngai ngei ang.

Tottenham manager hlui Pochettino enkawlna hnuaiah PSG hian Ligue 1 nomawi chu an chawi ngei, mahse goal an khung tam loh bakah Lionel Messi, Kylian Mbappe leh Neymar nei chungin league an thunun tawk lo.

Club neitu lamin an duh ber Champions League-ah beisei an phak lo chu an inṭhen chhan lian ber nia ngaih a ni. Last 16-ah Real Madrid an hmachhawn a, 2-0 a hma an hruai fal tawh hnuah an inpawhthlak tir leh a ni.

UCL chawi thei an duh a nih chuan Zidane hi a chhanna a ni thei ang. Mahse, Real Madrid manager hlui hian an ram France team enkawl a duh nia sawi a ni a, kumin tawp lama khelh tur World Cup zawhah France national team a enkawl zawk dawn nia sawi a awm.

Mourinho pawhin AS Roma chu a vawi khat nan European title a lak pui a, tun hnai mai khan Italian club nen hnathawh tur hmabak an la neih thu a sawi. Zidane leh Mourinho la tur chuan sum an sen hnem a ngai dawn, sum erawh club neitu lam tan harsatna a ni lo ang.