Liverpool-ah Nunez a chiang ta

Sadio Mane chhuak tur thawm karah Liverpool fan-ten hlimna tur an chhar ve leh ta a, Benfica striker Darwin Nunez chuan Merseyside club hi a zawm dawn - Reds ṭantute lawmin zuang ru!

Benfica chuan an striker Nunez chungchangah Liverpool nen inremna an neih thu hi an tarlang a, he thu buatsaih a nih lai hian Liverpool lamin thuchhuah an la siam ve lo thung.

Kum 22 mi forward manah hian Liverpool chuan pound maktaduai 64.2 an pe phawt dawn a, a khelh ṭhat dan a zirin a man hi pound maktaduai 85 thlenga sang chho thei tur a ni - club pahnih an lawm ve vein a rinawm!

Liverpool hian kum 2018 khan Virgil van Dijk chu Southampton aṭangin pound maktaduai 75-in an lo lei tawh a, Nunez hian beisei anga a khel a nih chuan Dutch centre back man hi a khum ngei dawn tihna a ni a, Liverpool player man to ber a ni ang.

A chhehvel
He thu buatsaih laia Liverpool an la ngawih miau avangin Nunez-a contract rei zawng leh hlawh tur sawi a la theih lo a, khawthlang media-ten an tarlan dan chuan kum ruk chhung atan contract hi a ziak ang.

Nunez-a man aṭang hian Reds-in £64.2mtd an pe phawt a, pound maktaduai 12.88 chu player khelh ṭhat dan a zira pek leh tur a ni a, £8.58mtd erawh Liverpool hlawhtlinzui dan a zira pek leh tur a ni.

Player hlawha inseng hnem khat tak Liverpool-in man to takin Nunez lei mah se a hlawh lamah an insum thung a, Uruguayan striker hian kar khatah £98,000 vel a hlawh dawn niin an sawi.

Liverpool-a hlawh hnem ber ni mek chu Virgil van Dijk a ni a, Dutch defender hian kar khatah £220,000 a hlawh meka ngaih a ni.

Hello Liverpool
Nunez hi Manchester United pawhin lakluh an duh a, mahse, Almeria striker hlui hian Anfield lam chiah a hawi niin an sawi a, Champions League khel lo tur Red Devils tan bazar a harsa zel.

Uruguay tan vawi 11 inlana goal hnih khungtu striker hian season hman zawh takah khan inelna hrang hrangah match 41 khelin goal 34 a khung a, league bikah match 28 khelin goal 26 a khung.

Primeira Liga-a match 28 a khelhah hian vawi 24 bul a ṭan a, a goal khung zinga goal 25 chu a bul ṭan ṭuma a khungte an ni - goal ruk chu Champions League-a a khung a ni a, match 10 a khel.

Champions League-a a goal khung zinga goal hnih chu Liverpool nen an inhmachhawn ṭuma a khung a ni a, Champions League quarterfinal-a Reds nena an intawn kha Jurgen Klopp-a thinlung a luah ṭanna a ni!

Mangṭha Mane?
Liverpool-in Nunez an lakluh rual hian Sadio Mane chhuah an pawi ti lo tih a lang tel nghal a, Bayern Munich-in lakluh an tum forward hian Germany lam panin a puanthuah a tel ngei dawn niin a lang ta.

Bayern chuan Mane hi lakluh tumin vawi hnih an dawr tawh a, mahse, an dawrna man zat a tam tawk loh avangin Liverpool hian an hnar ve ve - £42mtd aia tlawmin Reds hian chhuahtir an tum lo nia sawi a ni.

Hetihlai hian Liverpool chhuanvawr Mohamed Salah-a'n contract thar a la ziak thei lo a, season khat chauh contract a nei tawh. Brazilian forward Roberto Firmino pawhin thla 12 bak hun a nei tawh lo.

Klopp-a'n Liverpool a dinthar leh nana player ropui pathumten chhuahna kawngkhar lam an hawi mek a, German coach hian player naupang zawk Diogo Jota (kum 25), Luis Díaz (25) leh Nunez (22) hmangin team thar din a tum niin a lang.