Spain chak laiin Portugal an tlawm
UEFA Nations League-a an match hmasa pahniha an chak zawh loh hnuin Spain-in a zawnin hnehna an chang ve leh ta a, Switzerland an hneh hnuah Pathianni zan khan Czech Republic chu 2-0 in an hneh.
La Roja (Spain sawina) tan Carlos Soler leh Pablo Sarabia ten goal khat ve ve an khung a, Czech Republic hian hun tawp thlengin a chhanletna tur an nei lo.
Spain an chak laiin Portugal erawh an chak zo lo a, a zawna match hnih an chak hnuah Switzerland chu 1-0 in an ngam lo.
Switzerland tan Haris Seferovic chuan goal awmchhun a khung a, Cristiano Ronaldo tel lohna Portugal hian a chhanletna tur an nei lo a, an tlawm.
Spain an chak
La Rosaleda Stadium-a inkhelah Spain-in minute 24-na lekah goal hmahruai an khung a, Real Madrid winger Marco Asensio siamsak chu Valencia midfielder Carlos Soler chuan goal-ah a chantir.
Mualneitu Spain-in inkhel an thunun viau a, 72% zet ball an chang - mahse, an goal hnihna hmu tur erawhin an nghah rei a ngai a, hun tawp nan minute 15 a la awm tihin, Paris Saint-Germain player Pablo Sarabia chuan hnai set sawt aṭangin a khung.
Czech tan Eredivisie club Twente winger Vaclav Cerny leh Russian club Lokomotiv Moscow forward Jan Kutcha ten chance nei ve bawk mah se goal-ah an chantir thei lo a, hun tawp thlenga goal dang a luh loh avangin Spain an chak.
Spain-in Nations League bul ṭan ṭha lo mah se group A2-ah hma an hruai leh der tawh a, match li an khelhah point riat neiin pahnihna Portugal aiin khelh zat inangah point khatin an sang zawk.
Ronaldo tel lohna
Portugal boss Fernando Santos-a'n an thiampuipa Ronaldo a hahdamtir a, Manchester United forward tel loin Portugal player-ten goal khung an harsat - Switzerland lakah an tlawm.
Switzerland tan Haris Seferovic chuan second 55-na lekah goal hmahruai a khung a, Benfica forward-in goal khung hma viau mah se goal dang erawh kan hmu zui lo.
Portugal-in an mikhualna ramah si phurh sut theihna remchang vawi duai lo an nei a, mahse, Switzerland goalkeeper Jonas Omlin khelh ṭhat zan an tawng a, an vanduai.
Ligue 1 club Montpellier keeper hian Danilo Pereira, Goncalo Guedes, Bernardo Silva leh Diogo Jota khung tur nia lang chu a dansak vek a, Joao Cancelo chuan chance duhawm a hlah bawk.