Giroud a chhuak hnai

Chelsea manager Frank Lampard chuan tun hnaia chhuak tur anga sawi thawm awm reng striker Olivier Giroud chu January-ah a chhuah theih thu a sawi a, "Kan vaia hlawk tlanna tur a nih chuan a chhuak ang," a ti. 

Kum 33 mi striker hian tun season-ah league match hnihah chiah bul a la ṭan a, inelna hrang hrangah match sarih khelin goal khat a khung - Lampard-a'n kum 22 mi Tammy Abraham a duh zawk. Lampard chuan, "Ollie-a agent hian club pawh a titipui tawh tih ka hria a, mahse engkim tih fel a nih hma chu Chelsea player a la ni reng. Engtiklai pawhin professional takin a awm reng a, khelhna hmun a chang tam lo chungin a training ṭha em em reng a ni," a ti. 

France international striker hian January 2018 khan Arsenal aṭangin Chelsea hi thla 18 atan a zawm a, nikum May khan tun season tawp thleng Blues tana khel turin contract thar a ziak. 

Season hmasaa match 45 a khelh aṭanga goal 13 khungtu hi Inter Milan nen sawizawm mek a ni a, Italian club hi a zawm chuan Blues-a amah laluttu Antonio Conte nen an thawkdun leh dawn tihna a ni.