NECS Cup 2017 champion Chhinga Veng
Chhinga Vengin veng inelnaah nomawi an chawi ta. Lammualah kawr var ha mipuiin hlim takin 'Chhinga Veng - nuam nuam nuam' tiin an au rual a, football ngaina veng dangte awh rawn an ni ta.
Nimin NECS Cup 2017 final-ah Chhinga Veng chuan Vanlallawma goal hmangin Bawngkawn 1-0 in an hneh a, a vawi khat nan NECS Cup nomawi an chawi.
Goal khungtu Lawma hian goal 15 khungin top scorer niin a siam saktu Chhinga Veng tlangval Rochharzela chu best player-a thlan a ni.
A goal lo
MPL club nei Chhinga Veng hian final-a an hmachhawn Bawngkawn hi quarterfinal match hmasa berah 7-0 zetin an sawp tawh bawk.
Final-ah erawh Bawngkawn tan Lalnuntluanga leh H. Lalmuankima te an khel tawh a, minute 10 pawh ral hmain AFC midfielder Tluanga freekick pet chu MS Dawngliana'n rang zetin thai goal mah se offside vangin pawm a ni lo.
Chhinga Veng an insiamṭha thuai a, Rochhara, Sawmzela leh Lawma-te hmangin goal nawr mah se Bawngkawn keeper MC Lalneihsanga tan hna an siam thei lo. First half-a an chance neih ṭha ber Rochharzela cross chu Sawmzela'n goal zawnah a tauh thei lo.
Lawmna Lawma
Chawlhlawk hnuah Bawngkawn an insiam ṭha a, an goal nawr a na sawt. Aizawl FC winger MK-a'n MPL5-a a club khelhna veng tlarhnung a rum ṭhaih fo a, amaherawhchu Chhinga Veng tan K. Lalthlahlova (Patea) leh VL Thanga-te an ding khawng tlat.
Bawngkawn tlarhnung an chesual zeuh a, minute 65-naah Rochhara'n vengtu nei ngah mah se cross ball nei turin hun awl a insiam thei a, captain ball cross chu Lawma'n Bawngkawn defender pahnih kara rawn dawk chhuakin chiang zetin a hlap lut.
Goal an phurh hnu lawkah Bawngkawn midfielder Lalremruata'n ṭul lo takin yellow card vawi hnihna a hmu a, amaherawhchu player 10 nichungin Chhinga Veng an la tibuai pha tho.
Hun tawp hma hretin midfielder Lalṭhakima'n a hun ṭha a bawhpelh bakah striker Dawngtea'n keeper Sangtluanga chauh a hmachhawn hnuah a pet goal thei lo.
Team ṭha ber
Kumin NECS Cup-ah Chhinga Veng hian match riat an khelh aṭangin goal 37 an khung thei a, team ṭha ber an ni.
Quarterfinal lut turin Lungverh, Ramhlun Venglai leh Luangmual an hneh. Semifinal lut turin Bawngkawn, Sihphir Venghlun leh Electric Veng te nen group-ah awm hoin goal 15 an khung a, goal khat chiah an chhuah.
Final lut turin Thingsulthliah chu penalty shootout-ah an hneh a, champion turin vanneihna an nei tel bawk.
Coach a lawm
Chhinga Veng coach H. Lalremruata chuan, "A bul berah chuan Pathian a ni a, kohhran mipui min ṭawngṭaipuina rah a ni. Chhinga Veng mipui, Local Council member-te leh football club hruaitute ṭawiawmna ṭha kan dawng a, an chungah kan lawm takzet a ni," tiin Vanglaini palai a hrilh.
Coach thawkrim tak mai Remruata chuan, "Team kan inlungrual a, nomawi chawi turin kan thawkrim a ni. Veng chhung aṭangin min ṭawiawm ṭha a, kan mamawh sum leh pai thawhtu kan nei zel a, kan main sponsor Quality Walls neitu F. Kapsanga te chungah kan lawm hle," tiin khawtlang an ṭanrual thu a sawi.
TST an chawimawi
Thingsulthliah-in semifinal-ah Chhinga Veng hneh lo mah se an supporter-te chet dan mawi tak hmuh hmaih a ni lo. Aizawl khaw pawn aṭanga semifinal thleng thei TST hian Community Award leh Fair Play Award an dawng.
Inelna Thlirna Tawi
Bawngkawn 0 - 1 Chhinga Veng
CHH : Vanlallawma 65'
Rin Rin MoM : Vanlallawma, Chhinga Veng
Champion Chhinga Veng Rs 2,00,000
Runner Up Bawngkawn Rs 1,00,000
Semi Finalist Ramhlun South Rs 10,000
Thingsulthliah Rs 10,000
Community Award Thingsulthliah Rs 10,000
Fair Play Team Thingsulthliah Rs 10,000
Best Player Rochharzela, Rs 5,000
Chhinga Veng
Top Scorer Vanlallawma, Rs 5,000
Chhinga Veng (15 Goals)