Erik Lamela tan season a tawp

Tottenham Hotspur midfielder Erik Lamela chu a mawngbawr hliam vangin season tawp thleng a inlan thei dawn lo. Kum 25-a upa midfielder hi October 2016 aṭang khan hliam vangin Spurs tan a inlan tawh lo a, a hliam hi Inrinnia zai tura ruahmanna siam a nih tak avangin season tawp thleng a inlan theih loh tur thu hi tih chian a ni ta a ni.

Lamela chuan, "Ka ṭhat chhuah leh ngei theih nan theihtawp ka chhuah a, mah se 100%-in ka la dam chiang thei si lo. Ka beisei ang level sang inelnaa inlan tur chu ka la dam chiang lo a, ka hmaa chona inchhawp hi huaisen taka hmachhawn ka tum a ni," tiin twitter lamah a ziak.

Tottenham lam pawhin an player chungchangah thuchhuah siamin Lamela chuan ṭhat lam pan zel mah se dam chiang var tur chuan zai phawt a ṭul thu an tarlang a ni.

Argentina international Lamela hian hliam vanga a buai hmain Spurs tan tun season-ah match 14 a khel hman a ni. Spurs hi kum 2013 khan Roma aṭangin a zawm a, season hmasaah khan kum duhawm tak hmangin goal 13 ngawt London club tan hian a khung sak.