I League a hnai leh ta Tu nge nomawi chawi dawn?
I League chawlh a ni a, April 1-ah India rama club inelna sang ber khelh ṭan a ni leh tawh dawn. International break hnua match hmasa berah Mohun Bagan leh Bengaluru FC an inhmachhawn nghal dawn a, Mizo te nghahlelh Aizawl FC chuan April 9-ah Bengaluru-ah an zinkawng an ṭan ve leh thung ang.
I League-ah team 10 an awm a, home & away a khelh a nih avangin club tinin match 18 ṭheuh an khel dawn tihna a ni. Tun dinhmuna I League nomawi chawi thei nia lang chu Aizawl FC, East Bengal leh Mohun Bagan an ni a, hmahruaitu Mizo club hian match 14 an khelh tawhah point 30 hmuin hma an hruai mek a, khelh zat inangah an hnuai chiaha awm East Bengal aiin point thumin an sang a, Mohun Bagan chuan a chunga awm club pahnih aia vawi hnih khel tlemin Mizo club hi point sarihin an phak lo.
Champion tur Mizo club?
Hmahruaitu Aizawl FC-in an hmabakah match li khelh tur an la nei a, heng zinga match khat chiah hi mahni khelmuala khelh tur an neih a ni. Mizo club hian Bengaluru FC an lenchilh hnuah Churchill Brothers an tlawh chhunzawm ve leh ang a, April 22-ah Mohun Bagan mikhualin Kolkata club nen an inkhelh zawhah Shillong Lajong an lenchilh leh dawn a ni.
Aizawl FC-in I League-ah hma hruai mek mah se Bengaluru hi an khelmualah chuan tawh an khirh leh dawn tih hi thil chiang sa a ni a, Churchill Brothers hi coach thar Derrick Pereira an neih hnuah match li khelin vawi thum an chak a, match zawna Mohun Bagan leh East Bengal hneh thei an nih bawk avangin season ṭantir lam ai kha chuan an ṭha tawh zawk tih a chiang.
Mizo club-in RG Stadium-ah tlawm hmel an la hmuh loh avangin Mohun Bagan an mikhual tur hi an hmabak match li zinga a 'awl' ber tur ni zawkin a lang hial - Kolkata club zawha lenchilh tur Shillong Lajong hi an muala hneh an harzia hrechiangtu chu Aizawl FC tho an ni. Meghalaya club hian nikum khan Mizo club hi an mikhual ṭumin 3-1 nen an puanthuah an lo tel tir tawh.
Mahse maw....
'Ka hmangaih che, mahse....' tih leh 'Mahse, ka hmangaih che...' tih hi 'mahse' hmanna ve ve ni mah se a hnuhnung zawka 'mahse' tih hi mitin duhthlan a ni ngei ang. Aizawl FC tana kan 'Mahse' hi chu ngei chu a ni. Mizo club-in beisei phak bakin I League-ah an khel ṭha a, nomawi chawi thei dinhmunah hial an ding. Hetichung hian India coach Stephen Constantine chuan friendly match leh AFC Asian Cup qualifier khelh turah Aizawl FC player pakhatmah a ko lo a, English coach hian sawiselna a tawk nasa hle. Mahse, Aizawl FC coach Khalid Jamil-a'n duh thlang thei ngat se rampawna inkhel chau tura a player-te tirh chhuah ai chuan tuna an dinhmun hi a thlang zawk ngeiin a rinawm.
Mizo club elpui ber East Bengal players zingah player pasarih ngawt goalkeeper TP Rehenesh, Arnab Mondal, Narayan Das, Jackichand Singh, Md. Rafique, Rowllin Borges leh Robin Singh te an zin chau vek a, Mohun Bagan-in Pritam Kotal, Anas Edathodika leh Jeje Lalpekhlua te an thawh a, Bengaluru players zingah Nishu Kumar, Sandesh Jhingan, Udanta Singh, Eugeneson Lyngdoh, CK Vineeth leh Daniel Lalhlimpuia te chu India tana feh chhuak zingah an tel.
Club lian pathum aiin Mizo club player-ten chawlh hahdamna hun an ngah zawk tihna a ni a, inzirna hun an ngah zawk tihna a ni tel bawk. Hei mai hi a la ni lo, Mohun Bagan-in Bengaluru an la hmachhawn dawn a, Mizo club nena inum ber East Bengal leh Bagan ten Kolkata Derby an khelh a la ṭul bawk! Club lian pahnihin an hmabak match-ah point an la hloh ngei dawn tih a chiang a, Khalid Jamil-a naute tan thu hriat nuam a ni.
Club dang dinhmun
Mumbai FC-in an coach Santosh Kashyap banin Spanish coach Oscar Bruzón an lalut a, RCD Mallorca assistant boss hlui hian Sporting Goa a enkawl tawh bakah Mumbai City FC a kaihhruai tawh bawk avangin Indian football-ah a mikhual lo - match li chiah khelh tur awm tawh chunga a mawngphah luah mektu Mumbai club hi a khai chhuak zo ang em? tih chu zawhna awm a ni a, a match hmasa berah chak tluang lai Churchill Brothers a mikhual dawn bawk avangin a hna a awlsam dawn lo.
Mohun Bagan coach Sanjoy Sen-a'n 2015-a I League nomawi an chawi ṭumin match thum an tlawm thu a sawi lang a, Churchill Brothers an ngam loh hnuah Mumbai leh Bengaluru draw chhunzawm mah se nomawi chawi a la tum tih a chiang - mah se, an mikhual tur Bengaluru hian Bagan nomawi chawi lai hmuh an duh lo. Bangalore club hian Kolkata club an mikhual ṭuma club CEO Parth Jindal ṭawngkam chu, "Nomawi kan chawi dawn lo a nih chuan Bagan pawhin an chawi bik tur a ni lo," tih hi a ni - Albert Roca-a'n a thinlungah a vawng reng ang.
Tun season hi I League tawp kum tur nia sawi a nih avangin East Bengal-in an club chanchina I League nomawi ziah tel tur awm lo tur chu ngai ngam loin champion ngei an tum a, an coach hlui Trevor Morgan an lalut. Kolkata club-in sum pawh an inseng nasa a, Mizo tlangval Lalrindika Ralte chuan, "Champion bak kan ngaihtuah lo a, hei hi kan sawi ber chu a ni," tiin Vanglaini palai hnenah a lo sawi tawh - mah se an thil tum hi chuti maiin a awlsam dawn lo; an hmabak match li zingah Kolkata derby a la awm tlat.
I LEAGUE - KHELH HMABAK
EAST BENGAL
Apr 9 Mohun Bagan (A)
Apr 16 DSK Shivajians (H)
Apr 23 Minerva Punjab (H)
- Mumbai FC (A)
AIZAWL FC
Apr 9 Bengaluru FC (A)
Apr 15 Churchill Brothers (A)
Apr 22 Mohun Bagan (H)
- Shillong Lajong (A)
MOHUN BAGAN
Apr 1 Bengaluru FC (H)
Apr 9 East Bengal (H)
Apr 12 Shillong Lajong (A)
Apr 15 Minerva Punjab (A)
Apr 22 Aizawl FC (A)
- Chennai City (H)
Team Dinhmun
# Team Pld W D L GF GA GD Pts
1 Aizawl FC 14 9 3 2 19 11 8 30
2 East Bengal 14 8 3 3 25 11 14 27
3 Mohun Bagan 12 6 5 1 18 8 10 23
4 Shillong Lajong 13 6 2 5 18 16 2 20
5 Bengaluru FC 13 4 6 3 17 12 5 18
6 Churchill Brothers 14 4 4 6 17 19 -2 16
7 DSK Shivajians 14 3 5 6 15 16 -1 14
8 Chennai City 14 3 4 7 11 21 -10 13
9 Minerva Academy 14 2 6 6 12 23 -11 12
10 Mumbai FC 14 2 4 8 8 23 -15 10