Ram tana goal khung hnem Ronaldo

Portugal captain Cris­tiano Ronaldo-a'n Sweden lakah ram tana a goal 71-na a khung a, heti zat goal khung tur hian ram tan match 138 inlanin khawvel huapa ram tana goal khung hnem top 10-ah a hming a chuangkai ve leh ta.

Manchester United aṭanga khawvel hriat hlawh forward hi ram tana goal khung tam pakuanaah awmin Saudi Arabia legend Majed Abdullah, Thailand manager nilai leh an striker chhuanvawr ṭhin Kiatisuk Senamuang leh Germany legend Miroslav Klose te nen ram tan goal 71 ṭheuh khungin pakuana dinhmun hi an luah a ni.

Ronaldo hian inter­na­tional football-a goal khung hnem ber ni tur erawh chuan hmabak a la ngah hle. Pakhatna din­hmun luah mektu Ali Daei chuan Iran tan match 149-a khelhah goal 109 zet a khung a, Bayern Munich striker hlui umphak tur chuan Portuguese forward hian goal 38 zet a khung a la ngai.

Season kal meka ram leh club tana goal 36 khung tawh Ronaldo hian Europe-a international football-a goal khung hnem a sang pali zingah a hming a nem kai ve ta bawk a, pathumna Klose nen an goal khung zat inang mah se German striker hian match khata a khelh tlem zawk avangin Ronaldo chungah a awm. Hungarian legend pahnih Sandor Kocsis (75) leh Ferenc Puskas (84) te chu Europe-a ram tana goal khung hnem top 2 an ni.