A va hmuhnawm dawn em! Zarkawt BCA Vs Khatla TBL

Tualchhung basketball-ah sawi ngaihnawm chuang loa hmuhnawm nghal tawp tur hi a awm a, chung inkhel zingah chuan zanin dar 7:00-a Zarkawt BCA leh Khatla TBL inkhel tur hi tehna hrang hrangah a tling vek a ni.

Mizoram Super League khelhna hmun Hawla Indoor Stadium hi veng pahnih punkhawmna atan a lian tawk lo a, basketball ngaina zawng zawng phei chu an leng lo hle. MSL final vawi hnih khelh tawhah ticket chang lo tam tak an awm a, inkhel en ṭhin chuan thil kal tawh aṭanga inzirin zanin inkhel hmuhnawm bik en tur chuan kal hma a fin thlak ang.

Mizo belhtu India player

History en let chuan Zarkawt BCA-in Khatla TBL an ngam lo a, amaherawhchu tun season hi Zarkawt lam chuan an tan hun ṭha inher chhuah hunah an ngai.

BCA hian Mizo hlangin Palpreet Singh Brar leh Amjyot Singh Gill te telna Tuikual South chu an match hmasa berah an hneh. Zarkawt club hian coach Lalruatfela hnuaiah MSL3-ah bul an ṭan ṭha a, an phur lai taka India player Amritpal Singh leh Yadwinder Singh ten a belh leh bawk avangin Khatla TBL tana mangchhia thlen turin an ṭha tawk tawh.

Zarkawt BCA coach Afela chuan, "Amritpal leh Yadwinder te hian Federation Cup-ah ONGC an champion zo chiah a, fitness ṭha taka Aizawl an rawn thleng hian minti phur khawp mai. Kan player lakte hi kan beisei aiin an ṭha a, Mizo player-te nen an inkawp rem nghal em em a, court chhunga an che vel ka en châk tawh a, a phur loh theih loh," tiin Vanglaini a palai a hrilh a, coach ber pawh a phur chuan mipui tan chuan phur loh theih loh a ni ngei ang.

BCA hian Mizo player ṭha Dennis Lalmuanpuia, Ma­thew Remtluanga Sailo, David Lalruat­fela bakah tun hnaia player hma­sawn chak tak Zonunsanga te an kawl a, MSL1-a an neih loh state pawn player ṭha an nei ta bawk.

An lian, an ṭha

India national team-a centre ni phak Amritpal Singh hi feet ruk leh inches 11-a sang a ni a, Yadwinder Singh hi Khatla TBL coach leh player ni kawp H. Laldinsanga (Mapuia) te nena India ram tana khel ho, tun thlenga la khel a nih avangin tawnhriat a nei ṭha tawh hle.

Zarkawt BCA coach Afela chuan, "Amritpal chu a lian sia, a chak sia, a thiam sia - training-naah chuan an dang thei lo a ni ber. Yadu hi kan mamawh tak a ni a, court chhungah hruaitu a ni a, a teammate-te tihtur a sawi zung zung a, kan ṭhat pui khawp ang," tiin a player-te a fak.

TBL an ni tlat!

Khatla TBL-in H. Laldin­sanga an nei a, Mizo zinga basketball-a sulhnu nei ṭha ber hi mi bik a ni. TBL coach Mapuia hian Chanmari Hollow an hneh ṭumin Garry Gill pawh nei lo se hnehna an chan tho a inrin thu Vanglaini palai a hrilh a, Mizo player neih danah a lungawi tawk hle tih a lang.

Mapuia hi MSL hmasa bera MVP a ni a, Champion lai TBL hian MVP ni lai Vanlal­muana an kawl bakah Gos­pel Lalthawmmawia, Nelson Lalrohlua leh Eddie Zaithan­mawia te an neih avangin inringtawk tur pawh a ni.

TBL lawmna belchhah turin an player laktum Vishesh Bhriguvashi chu Federation Cup-ah MVP atan thlan a ni a, thiamna zawnga lak chuan BCA lakluh ONGC player pahnih aiin a thiam zawk dawn tihna a ni. Amah­erawhchu MSL2-a TBL cham­pion puitu Vishesh hi hna lama buai vangin a rawn la zin ve lo.

Khatla TBL manager Lalawmpuia Pachuau chuan, "Vishesh hi a rawn tel theih hmel loh avangin keini chuan Garry Gill chiah kan nei dawn a, amaherawhchu training ṭha takin kan nei thei a. Kan match hmasa ber ai khan nasa takin hma kan sawn tawh a ni," tiin an inpeih tawh thu a sawi a, BCA phur vanglai hneh thei tur ṭha ber chu Khatla TBL hi an ni.