Nadal-a'n semifinal lut
Rafael Nadal chuan Jack Sock hnehin Miami Open semifinal a lut. Spanish star hian zanin dar 7:30 hian Fabio Fognini a hmachhawn zui leh nghal ang.
Nilaini zana Key Biscayne hmuna inkhelah Nadal hian harsatna nei loin 6-2, 6-3 in hnehna a chang. Nadal hian set hmasa zawkah a khingpui service hi vawi hnih a chhuhsak nghal a, set hnuhnung zawkah erawh game hmasa pahnih a hloh. Mahse, hun pawimawhah Nadal a inlar leh a, darkar khat leh minute 23 an inkhelh zawh meuh chuan straight set-in a tlang.
Grand Slam vawi 14 champion tawh Nadal leh Fognini te hi tun hmain vawi 10 an lo inhmachhawn tawh a, Italian star Fognini hian vawi thum hnehna a chang ve tawh, a bak ṭum saihah erawh Nadal a chak vek.
Kum 30-a upa Nadal chuan, "Kan inhrechiang tawn a, vawi thum ka hneh loh tawh a nih avangin min huphurh bik lo ang. Final lut tur chuan ka theihtawp ka chhuah a ngai dawn," a ti. Nadal hian Miami Open hi final vawi li a khel tawh a, a la champion lo, a la hlawhtlin ngai lohna hmuna nomawi chawi tur chuan Fognini a hneh leh phawt a ngai dawn.
Season hmasa a beisei phak lo Nadal hi kuminah a rawn khel ṭha chho leh mek. Grand Slam hmasa ber Australian Open final a lut a, nomawi inchuhna inkhelah Roger Federer a ngam lo. Swiss tlangval bawk hi Indian Wells-ah a hneh lo leh, tun ṭumah hian player ropui pahnihte hi an chak zel a nih chuan final-ah an intawng leh ang.
Quarterfinal inkhel dangah Fognini chuan Japanese star Kei Nishikori chu darkar khat leh minute riat chhungin 6-4, 6-2 in a hneh ve bawk - world number 40 Fognini tan ATP World Tour Masters 1000 semifinal a vawi hnih khelhna tur a ni ang.
Kum 29-a upa Fognini chuan, "Ka tan chuan he inelna hi a hlu, kei aia ranking sang zawk lakah hnehna changin semifinal ka lut. Ka khelh danah ka lung a awiin inrintawkna ka nei sang a, semifinal-ah pawh ṭha taka ka kheh zui theih ngei ka beisei," a ti. Miami Open-ah hian tun hnai kum 10 chhungin Fognini chiah hi seeded chang phak lo player zinga semifinal lut thei a ni.
Nizan khan quarterfinal match hnih khelh niin Grand Slam vawi 18 champion tawh Federer leh Tomas Berdych an inhmachhawn a, seeded pakhatna Stan Wawrinka hnehtu Alexander Zverev leh Nick Kyrgios te an inkhel bawk - he thu buatsaih lai hian result kan hre hman lo.