Kum khat atan Mohammad Irfan hrem

Pakistan Cricket Board chuan fast bowler Mohammad Irfan chu spot-fixing chungchanga insawifiah tura vawi hnih an koh hnuah a inlan duh loh avangin kum khat chhung inlan thei lo tura hrem a ni.

Kum 34-a upa Irfan hian Pakistan tan test, ODI leh Twenty20 match a khel ṭhin a, tuna hrem a nih chhan hi ram tana a inlanna lamah niloin Pakistan Super League vang zawk a ni. Irfan-a'n Islamabad United tana a khelhpui Sharjeel Khan leh Khalid Latif-te chu hrem lailawk an lo ni tawh bawk.

September 2016-a England nen an inhmachhawn hnua ram tana la inlan leh lo Irfan hi tihsual a neih nawn loh a, anti-corruption education program-ah PCB phut anga a kal a nih bawk chuan hrem a nihna hi kum chanve atan tih tawi sak a ni ang a, a sum chawi tur zat £7,680 (Rs. 620,183) erawh a ngai reng ang.

Spot fixing hi match fixing nen inzul viauin lang mah se a inlang lo. Inkhel result thlak danglam hlawk tura player-ten thamna an lak hi match fixing a nih laiin over khat emaw ball vawi khat vawm bik emawaa thamna sum player-ten an lakin spot fixing a ni thung.