Golden State tan match khat a la ngai ; Boston Celtics mualah an lut zui dawn

NBA champion ni turin Golden State Warriors dinhmun a ṭha leh ta hle. Warriors hian nimin zing khan an mikhual Boston Celtics chu 104-94 in an hneh a, best of seven series-ah 3-2 in hma an hruai ta chiah.

NBA Finals game 5 inkhelah quarter hmasa leh a hnuhnung bera che fuh zawk Golden State an chungnung zawk. June 17, Zirtawpni hian game 6 an khel leh dawn, an chak a nih chuan an champion ang. TD Garden a nih tawh dawn avang erawh chuan a awlsam dawn lo.

Wiggins a inlar
Stephen Curry leh Klay Thompson te hming a langsar ṭhin, nimin zing inkhela a changtupa erawh Andrew Wiggins a ni. Ani hian point 26 a nei a, rebound vawi 13 la bawkin NBA playoff a khelh tawh china a chet ṭhat ber ṭum a tawng.

Wiggins hian a pa Mitchell sulhnu a chhui. Kum 36 liam ta daih tawh khan bench aṭanga lut chungin Wiggins-a pa hian Houston Rockets chu Boston Celtics lakah a lo chakpui tawh; 1986 NBA Finals hlimthla kan hmu nawn a ni ber mai.

Kum 27 mi Wiggins chuan, "Hetiang hun ṭha leh remchang hi chu dam chhungin vawi khat bak a thleng kher lo ang, chumi remchang ka nang fuh leh hmang ṭangkai thei hi ka lawm, team thawhrimna rah kan seng," tiin a sawi.

Match hmasa lama point 43 tehmeuh neitu Curry erawhin ni dang a phak lo. Playoff chinah a zawna match 133 chhung, match tin 3 point a neih ziah chu a tawp. Nimin zing bakah khan 3 point neih tuma vawi kua a shot chu a hlawhchham vek.

American point guard Curry hian point 16 a nei tling ta tho a, a khelh ṭhat loh niah pawh player vantlang chunglam a la ni phak tho. Point 21 neitu Thompson a langsar bawk a; Gary Payton II leh Jordon Poole te hming lam hmaih a thiang lo bawk.

Boston tan beiseina
Boston Celtics lamin a tira bul an ṭan fuh loh an tuar, quarter hmasa berah 27-16 zetin an hniam nghal. Chawlhlawk hmain point 15 laia hniam chang pawh an nei, half time an hman erawh chuan an dinhmun an siam rem chho mek thung.

Quarter thumnaah Ime Udoka-a nauten thapui an thawh, a zawnin point 10 te an nei. An thiampuipa Jayson Tatum-a'n a zawna 3 point a rawn vawm luh pawp pawp kha chuan Golden State pawh an chi ai, coach Steve Kerr-a'n time out a koh phah hial.

An inkar an sawr zim zel a, point hnih chauha an hniam hnuah point thum neih belhin hma an hruai let ta hial! Amaherawhchu, quarter thumna zawh dawnah turn over an nei a, hamrik hnuhnung rik rualin Poole-a'n hla tak aṭanga 3 point vawm lutin a chungnung tlang leh ta zawk.

Hun tawp dawna time out an lak hnuah pawh Jayson Tatum leh Draymond Green ten ball an la inchuh rap rap, boruak sang tur erawh an khap dai thei. Anni pahnih hi game 6-ah an inveng leh dawn, a hmuhnawm loh ring suh.

NBA vawi 17 champion tawh Celtics hian theihna an nei. Eastern Conference semifinals-ah pawh dinhmun hniama an din hnuin NBA champion Milwaukee Bucks an lehthal thei, chuvangin Warriors pawh hneh let turin beiseina an la nei sang khawp ang.