Arsenal player thar Marquinhos

A ṭha sa ni lo, nakina la ṭha tur bawk an la lut. Arsenal chuan Brazilian forward Marquinhos chu Sao Paulo aṭangin an lei fel a, kum 19 mi forward hi season nga daih contract an ziahpui.

Sao Paulo aṭanga inzir chhuak Marquinhos hian nikum July thla khan senior team tana a match hmasa ber a khel, a club tan hian inelna hrang hrangah match 41 a khelh aṭangin goal li a khungsak.

Arsenal technical director Edu chuan, "Marquinhos hi kan player enthlak zinga mi a ni, ani kan la lut thei hi a lawmawm. Kum 19 mi chauh a la ni a, nakin zela player ṭha tur a ni. Pre season aṭangin training a rawn zawm nghal thei ang," a ti.

Gunners hian tun dinhmunah Eddie Nketiah chiah tlarhma laia chhawr tur an nei, tuna an lei thar Marquinhos hi season thara chhawr tur a nih a la rinawm loh; nipui bazar chhungin striker dang an melh chhunzawm chu a rinawm.