Tottenham-in Bissouma lalut dawn

Champions League khel tur Tottenham Hotspur chu transfer bazar-ah an chet nat chhunzawm zel a, Brighton & Hove Albion midfielder Yves Bissouma chu pound maktaduai 25-a lalut turin inremna an neihpui tawh.

Mali international Bissouma man zatah club pahnih inrem tawh mah se Spurs hi player nen an indawr ve leh phawt dawn a, tun kar tawpah hian medical a neih hman beisei a ni bawk.

January thlaa Bissouma lo hel tawhtu Spurs hian kum nga chhung atan contract an ziahpui dawn nia sawi a ni a, a hlawh zat tur erawh sawi theih a la ni rih lo.

Bissouma hian French club Lille aṭangin Brighton hi July 2018 khan a zawm a, tunah hian thla 12 bak cham turin contract a nei tawh lo. English club a zawm hnuah inelna hrang hranga match 124 inlansakin goal ruk a khung a, assist vawi thum a nei bawk.

Spurs hian nipui transfer-ah Southampton goalkeeper Fraser Forster leh Inter Milan winger Ivan Perisic te chu free transfer-in an lalut tawh a, Middlesbrough right back Djed Spence an rim mek bawk - Spurs hian coach Antonio Conte chu tun nipuia bazar nan pound maktaduai 150 an pe niin an sawi.