Mittui nen Marcelo a liam ta
Real Madrid defender Marcelo chuan mittui tla chungin Madrid khaw club thlahna thu a sawi ta a, season tharah chuan Brazilian defender ropui hian Real tan a khel tawh dawn lo.
Kum 34 mi defender chuan, "He club ka chhuahsan dawn hian ka sulhnute ka thlirkir a, vawiin hi Madrid ka pan hnua ka hlim ni ber a ni hial ang," a ti a, club tana a hnathawhte a chhuang hle.
Marcelo hian Real Madrid tan Champions League nomawi panga leh La Liga nomawi paruk a hlawh chhuak a, Madrid-a a cham chhungin nomawi 25 a hlawh chhuak hman!
Real Madrid chanchinah Marcelo aia an club tana nomawi hlawh chhuak hnem an la awm lo - Brazil international hian ropui taka thlah hi a phu takzet.
Khawngaihna aia hmingṭhatna
Brazil tana vawi 58 inlana goal ruk khungtu Marcelo hian January 2007 khan Real Madrid hi a zawm a, match 545 inlansakin goal 38 ngawt a khung a, assist vawi 103 a nei bawk.
Real tan La Liga (6), Copa del Rey (2), Supercopa de España (5), Champions League (5), UEFA Super Cup (3) leh FIFA Club World Cup (4) ah te a champion a, a sulhnu hi player tam tak duhthusam a ni.
Mahse, a hun tawp lamah khelhna hmun a chang tam tawk lo a, season hman zawh takah khan match 17 chiah a khel. Sulhnu aṭanga thlir chuan Marcelo hian contract thar a phu a, mahse, amah berin a duh lo.
Marcelo chuan, "Khaw-ngaihna avanga season hnih emaw season khat cham belh hi ka duh lo," a ti a, a cham dawn a nih chuan club-in an la mamawha an inhriat avang chauha cham a duh.
A ruk loin...
Marcelo hi Real tana a khelh chhungin FIFA FIFPro world XI-ah vawi ruk ngawt a lang a, UEFA team of the year-ah ṭum thum a lang bawk - khawvela left back ropui sawi apiangin a hming a ri tawh dawn.
Brazilian defender chuan, "Real Madrid ṭantu ka ni reng tawh dawn a, chhuak tur hian thutlukna kan siam dun. A ruk a rala hnung lam aṭanga chhuah ai chuan, kawngkhar hma lama chhuah mai hi ka duh zawk a ni," a ti.
Marcelo hi Turkish club Fenerbahce leh French club Marseille nen sawizawm mek a ni a, he thu buatsaih a nih lai hian thutlukna erawh a la hriat theih loh.
Brazilian Serie A club Fluminense aṭanga a career ṭantu defender chuan, "Legend angah ka inngai lo a, hei hi ka tawpna tur a ni lo. Ka inkhelh chhunzawm zel dawn a, chuti chung chuan ka hma hun atan ngaihtuahna ka seng vak lo," a ti.
Ka lawm e
Marcelo chuan, "A harsa ber chu mangṭha tia inthlah hi a ni a, Real jersey hak hi ka hringnuna hun duhawm leh mawi ber pawl a ni," a ti a, club president Florentino Perez chuan Marcelo hi Real gold membership badge a hlan.
Perez chuan, "Kan captain ropui tak hi ropui taka thlah kan duh a, Real legend, kan club chanchina nomawi chawi hnem ber chanchin kan sawi a nih hi," a ti a, kum 15 zet an hnena cham Marcelo a dah sang hle.
Real hotupa chuan sawi zawmin, "Duhtak Marcelo, i duhthusam zawng zawng chu i tihlawhtling a, nomawi chawi theih zawng zawng i chawi bawk.
"Sawisel rual lohin khawvela full back ṭha ber pawl, mi danglam bik i ni," a ti a, Real Madrid fan-ten an captain ropui chu Real jersey nen khelmuala a inlan lai hmu leh tawh ngai lo turin an thlah ta.
Real-a Marcelo hlawhtlinna
La Liga
2006–07, 2007–08, 2011–12, 2016–17, 2019–20, 2021–22
Copa del Rey
2010–11, 2013–14
Supercopa de Espana
2008, 2012, 2017, 2019–20, 2021–22
UEFA Champions League
2013–14, 2015–16, 2016–17, 2017–18, 2021–22
UEFA Super Cup
2014, 2016, 2017
FIFA Club World Cup
2014, 2016, 2017, 2018