Australia-in FIFA World Cup an khel dawn
Australia-in a vawi ruk nan FIFA World Cup an khel dawn a, Socceroos hian kum 2006 aṭanga khan football inelna sang ber hi an la khel ziah.
Thawhṭanni zan khan Al Rayyan Stadium-ah Inter Continental Playoff khelh a ni a, minute 120 chhungin Australia leh Peru ten goal an khung lo. Penalty shootout-ah Socceroos an vannei a, 5-4 in hnehna an chang.
Asia = 6
Asia aṭangin team ruk an khel dawn a, Europe khawmualpui tih loah chuang khel hnem ber an ni. Inelna thlengtu Qatar leh Socceroos bakah Iran, Japan, Saudi Arabia leh South Korea ten an khel dawn.
Australia hi group D-ah France, Denmark leh Tunisia te nen awn awm ho dawn a, group stage paltlang a harsa ang. Socceroos hian kum 2006 khan round of 16 an thleng a, hemi tih loh chu group stage paltlang an la nei lo.
Nizan khan Costa Rica leh New Zealand ten Inter Continental Playoff hnuhnung zawk an khel a, World Cup khel tur ram 32 a hriat kim ang.
A goal lo
Playoff khelhna Al-Rayyan Stadium hi Ahmad bin Ali Stadium tih a ni bawk a, FIFA World Cup khelhna tur niin match sarih a thleng dawn. Australia-in playoff an khelh avangin inelna hmun tem lawkna an nei.
Inkhel nung ṭha takah chance ṭha hmuh tur a awm mai lo. Darkar chanve chhoah Australia winger Martin Boyle chu Peruvian midfielder Christofer Gonzales-a'n a tlawh thlu a, box pawn chiah a nih avangin Peru an him.
Goal chance hmuh tur a awm meuh lo a, Aussies wing back Aziz Behich chuan box pawn aṭangin goal pawnah chiahah a pet bakah player rinrawl Ajdin Hrustic ball pet chu Peru keeper Pedro Gallese-a'n a dansak bawk.
Penalty-ah Redmayne
Hun pangngaiah goal a lut lo, extra time-ah Peru winger Christian Cueva-a'n box chhungah chance ṭha nei mah se goal zawnah a pet lo. Vanduaina belhchhah turin Peru striker Gianluca Lapadula-a'n goal ban a tauh per. Extra time-ah goal a lut chuang lo a, penalty hmanga chak zawk zawn a ni.
Australia tana pet hmasa ber tu Martin Boyle-a'n a hlah. Peru dinhmun ṭha zawkin pathumnaa rawn chhuak Luis Advincula-a'n goal ban a pet per a, panganaa Alex Valera pet chu Mathew Ryan thlaktu substitute keeper Andrew Redmayne-a'n a dansak.
Coach hnathawh
Australia hi 2018 World Cup zawh aṭang khan Graham Arnold-a'n a enkawl ṭan a, Socceroos chet ṭhat tawk loh chhanah kum 58 mi hian sawisel a hlawh. Tunah erawh Arnold hian World Cup a hruai thleng a, amah sawiseltuten ngaihdam an dil a ṭul ta zawk.
Arnold hian huaisen takin penalty shootout hmain ram tana vawi 74 inlan tawh Mathew Ryan la chhuakin vawi hnih chiah la inlan Redmayne a dahluh a, penalty shootout-ah an vannei zui bawk. Redmayne chuan, "Hmingṭhatna la thei ka ni lo. Minute 120 chhung theihtawp chhuaha tlan an awm a, team hnathawh a ni a, mimal thawhrah a ni lo. Midang ang bawkin ka hna ka thawk a ni," tiin a sawi.
Australia coach Arnold chuan, "A tawpah chuan ṭhumvawr ang lek a ni a, a vannei zawk an chak. Chutihrualin ka naute erawh ka fak duh. Ka nauten hun harsa tak an paltlang a, hemi paltlang tura theihtawp an chhuahna hi hmuh hmaih a thiang lo," tiin a player-te a fak.
Peru coach Ricardo Gareca chuan, "World Cup khelh beiseina sang tak kan nei a, kan thleng zo ta lo. Hrehawm kan tih dan hi thua sawifiah chi a ni lo. Penalty ngai loa chak kan tum a, kan tlin ta si lo," tiin hrehawm a tih thu a sawi.
Asia - Fourth Round
June 7, Thawhlehni zan
United Arab Emirates 1 - 2 Australia
UAE : Caio Canedo 57'
AUS : Jackson Irvine 53'; Ajdin Hrustic 84'
Inter Continental Playoff
June 13, Thawhṭanni zan
Australia 0 - 0 Peru
Penalty Shootout-ah Peru 5-4 in an chak
Penalty Pet Dan
Australia
Martin Boyle X Gianluca Lapadula G
Aaron Mooy G Alexander Callens G
Craig Goodwin G Luis Advincula X
Ajdin Hrustic G Renato Tapla G
Jamie Maclaren G Edinson Flores G
Awer Mabil G Alex Valera X
World Cup Thlirna Tawi
• Inelna hi November 21 aṭanga ṭan tur a ni a, December 18-ah khelh zawh a ni ang.
• Inelna hi Qatar-in a thleng dawn a, khawpui pangaah khelh tur niin stadium pariatah khelh a ni ang.
• Ram 32 khel tur aṭangin ram 30 khel tur a chiang tawh a, playoff khel tur ram pahnih chiah a chiang tawh lo.
Group Inṭhen Dan
Group A: Qatar, Ecuador, Senegal, Netherlands
Group B: England, Iran, USA, Wales
Group C: Argentina, Saudi Arabia, Mexico, Poland
Group D: France, Australia, Denmark, Tunisia
Group E: Spain, Costa Rica/New Zealand, Germany, Japan
Group F: Belgium, Canada, Morocco, Croatia
Group G: Brazil, Serbia, Switzerland, Cameroon
Group H: Portugal, Ghana, Uruguay, South Korea