Cricket umpire clinic buatsaih

Cricket Association of Mizoram chuan Thawhṭanni aṭang khan cricket umpire-te inzirna tur umpire clinic a buatsaih.

Central YMA Hall-ah he clinic hi neih a ni a. India cricket thuneitu sang Board of Control for Cricket in India aṭangin umpire pahnih Satrajit Lahiri leh Susanta Pathak ten he clinic-ah hian zirtirna an pe a ni.

Clinic hi ‘Introductory to Level 1 umpiring’ niin BCCI hnuaia Level 1 umpire nihna kailawn pawimawh a ni a. Cricket a ‘Laws of the game’ enkawltu Marylebone Cricket Club hnuaia Test cricket dan an zir.

Mizoram hmun hrang hrang aṭangin mi 37 an tel a, Aizawl pawn aṭangin Serchhip, Champhai leh Siaha district aiawhte an tel a. An zingah hmeichhe pahnih an tel bawk.

Vawiin hian Ramhlun Sports Complex leh CAM Indoor facility-ah practical session neih a ni ang.