Monica Puig a chawl

Rio Olympic an neih ṭum khan hmeichhe tennis huangah beisei loh thil a thleng, rinkai leh langsar ni miah lo Monica Puig chuan gold medal a vaw chhuak a nih kha, tunah chuan kum 28 mi chauh niin tennis a chawlhsan.

Puerto Rico rama infiammi zingah Olympic gold medal la thei hmasa ber a ni a, an ramah chuan lar tak a ni. Mahse, tournament dangah beisei ang erawh chuan a hlawhtling zui ta lo - world ranking lama a tawn san lai ber pawhin number 27 a ni.

Puig chuan, "Kum thum chhung hliam vangin ka buai ta, hemi hun chuung hian vawi li ngawt zai ka tawk. Ka kum zat ka ngaihtuah a, inkhel turin hun ka la neiah ka ngai. Mahse, ka taksain tennis khel zel turin a tlin tawh lo," tiin a chawlh thu a puang.

Olympic gold medal a lak bakah hian 2014 khan Strasbourg Open nomawi a chawi bawk a ni.