Los Angeles defender thar Chiellini

Italian defender ropui Giorgio Chiellini chuan Juventus a chhuahsan hnuah Major League Soccer lam a hawi a, Los Angeles FC chu free transfer-in a zawm.

Kum 37 mi Chiellini hian twitter kaltlangin MLS club a zawm thu hi a puang a, Los Angeles FC lukhum leh jersey ha chungin, "Bung thar ka kai ta," tih a ziak.

Italy tana vawi 117 inlan thei Chiellini hian a contract rei zawng tarlang lo mah se, thla 18 chhung atan US club hi a zawm niin an sawi a, a hlawh zat tur tarlan a awm lo.

MLS-ah club-te chu player hlawh atana hman phal zat bituk sak an ni a, salary cap-in a huam loh turin player pathum an lalut thei a, 'designated player' tih an ni.

Mahse, Chiellini hi 'designated player' angin LAFC lam hian an dawr lo nia sawi a ni a, chuti a nih chuan kum khatah pound maktaduai 1.31 aia tam a hlawh a rem dawn lo tihna a ni - chutihrual chuan contract pawn lamah hriat lohin inremna a awm thei bawk.

Euro 2020-a Italy champion puitu Chiellini hian, "Player ka nihna anga zawi muanga chawl turin hmun danga inkhelh ka mamawh a, ka rilru chu club director-a thawk tur pawhin a inpeih viau tawh," tiin Italian radio lamah a lo sawi tawh a, LA lam hian a chawlh huna administrator hna thlengin an zawrh a ni ve thei bawk - hei erawh rin thu a ni.

Chiellini hian Juventus a chhuahsan khan kum khat cham turin contract a la nei a, mahse, Italian club hian a hun hmaa a contract tihtawpsak phalin, zângnadawmna pound maktaduai 2.07 an pe niin an sawi bawk - a la hlawk viau tho.

Juventus tana Serie A nomawi vawi kua chawitu Chiellini hian, "League hmasawn tak, kei pawhin hma ka sawn theihna tura khelh ka duh. Khelmual pawna thil thleng thlengin inrawlh ka duh a, mahse, chu chuan thawhrimna, dawhtheihna leh inpekna a mamawh dawn a ni," tiin Radio Anch'io Sport hnenah a sawi.