3rd Khelo India Youth Games an ṭan ta

3rd Khelo India Youth Games chu Zirtawpni khan Guwahati-ah a hawnna neih a ni a, Indira Gandhi Stadium-a entu 25,000 bakah TV aṭangin mi nuai chuangin an thlir.

Assam chief minister Sarbananda Sonowal leh union sports minister Kiren Rijiju te chuan a hawnna hi an nei a, high-tech laser show leh hmuhnawm chitin reng lantir a ni. Khelo India-ah hian state 37 leh Union Territories aṭangin infiammi 6,800 bawr vel an tel - Mizoram aṭangin player 79 leh official 22 kalin an vaiin mi 101 an ni.

Nimin khan Mizoram aṭanga kal football team chuan Under 17 inelnaa an match hmasa berah Bihar 8-2 in an sawp. Mizoram tan hian Malsawmzuala'n goal li a khung a, Lalrintluanga'n goal hnih a khung bakah Laldanmawia leh Lalmuanpuia'n ten goal khat ve ve an khung. Mizoram team hi R. Lalmuankima (coach) leh Lalthawmmawia (manager) ten an enkawl.

Table Tennis-ah Mizoram aiawh Jeho Himnakulhpuingheta leh Alberto LR Ruata ten Delhi player Aadarsh Chhetri leh Arush Dutt chu 14-12, 11-5, 11-9 in an hneh. Mizoram hi boxing (Under 17), Football (U 17 - Mipa leh Hmeichhia), Hockey (U21 - Hmeichhia), Judo (U17), Table Tennis (U17), Weightlifting (U17 &21) leh Wrestling (U17) ah te an tel a ni.