Arsenal dinhmun fiah tur Man City
Pathianni zan dar 8:30-ah Manchester City chu Premier League match pawimawh khel turin Arsenal khelmual Emirates Stadium-ah an lenglut ang. Arsene Wenger-a'n April leh May thla hi Gunners season dinhmun tih chianna hun tur a nih thu a sawi a, City an mikhual tur hi a mimal hmalam hun hriltu pawimawh a ni nghal dawn bawk.
Spanish manager Pep Guardiola kaihhruai Manchester City hian nikum December thla khan Etihad Stadium-ah Arsenal hi 2-1 in an lo hneh tawh a, tun dinhmunah league table-ah pathumna niin parukna Gunners aiin point sarihin an sang zawk - inrintawkna an nei sang dawn. Chutihrualin City hi Arsenal khelmuala an lenluh hnuhnung berah 2-1 in an tlawm haw tih erawh an la theinghilh bik lo ang.
Arsenal fiahna
Season tawp ruala Arsenal tana a contract tawp tur Wenger-a'n Premier League nomawi a beisei ngam tawh lo a, Champions League-a an chanchin pawh amah sawisel leh nuihsawhna mai a ni rih. League match khelh hmabak 11 an la neih hi amah leh season thara an club awmdan tur hriltu a ni ang.
Gunners manager Wenger chuan, "Hun harsa kan paltlang dawn mek a, inkhel hautak leh pawimawh keimahni khelmuala kan khel thei tur hi a lawmawm hle. Thla hnih kan hman leh tur hi kan season hriltu pawimawh a ni dawn, result ṭha nei tura kan mamawh chu thawhhona ṭha a ni," a ti. Wenger hian City lakah attacking game an khelh tur thu a sawi tel bawk.
Midfielder Santi Cazorla chu a hliam a la dam loh avangin tun season chhung an chhawr thei tawh dawn lo a, keeper Petr Cech a la fit lo bawk. An league match hnuhnung bera West Brom an hneh loh ṭuma chesual David Ospina hian inkhel bul a ṭan leh a nih chuan a tihsual a siamṭhat a ṭul tawh ang.
Forward Alexis Sanchez-a'n Venezuela 3-1 a an hneh ṭumin Chile tan goal a khung, Gunners tana league goal khung nem ber nilai hi City tlarhnung tan ven ngun a ngai leh dawn. Germany international Mesut Ozil pawh Azerbaijan nen an inhmachhawn ṭumin minute 20 chhung a inkhelh theih avangin City a hmachhawn thei ang.
Pep a chungnung
Barcelona leh Bayern Munich enkawl tawhtu Guardiola hian Arsenal manager Wenger nen an intawn tawh vawi kuaah vawi nga hnehna a chang a, ṭum hnih chu inhnehtawkin vawi hnih chiah chak loh a nei, heng match pahnihte hi Champions League-ah a ni. City a enkawl hnuah league match-a an intawn hmasak berah hnehna a chang bawk.
Kum 1975-76 khan City hian season khat chhungin league match-ah bik Arsenal hi vawi hnih an hneh tawh a, hemi hnuah an la hneh nawn leh ngai lo. Arsenal khelmualah league match khel tura an zin chhuah hnuhnung 19-ah vawi khat chiah chak an nei; Pep-a naute hian an sulhnu ṭha lo thaibo tur chuan thapui an thawh a ngai ang.
City hian hliam vangin Ilkay Gundogan leh Gabriel Jesus te an la chhawr thei dawn lo, defender Bacary Sagna leh Pablo Zabaleta te dinhmun a chiang lo, hliam tenau nei Raheem Sterling leh Kevin De Bruyne te chuan tunkar tir lam aṭang khan team training an zawm leh tawh thung.
Spain leh Germany-ah Guardiola hian league nomawi a chawi tawh, Arab sum hmanga siam len City hian league bakah Champions League nomawi an duh avangin khawvela manager hlawh hnem ber ni turin an lalut. Pep hian an lakluh chhan ber pakhat UCL nomawi a chân tawh.
Guardiola-a'n league nomawi beiseina chhe te a la neih vawng nun tur leh season thara Europe club te inelna sang hmachhawn thei turin point an mamawh - Arsenal khelmualah hnehna chan an tum ngam ang.