Chanmari Hollow an comeback ropui
Mizoram Super League kai thar Chanmari Hollow-in Mission Veng Vikings an hmachhawn ṭumin Mohit Bhadu an neih sa bakah India tana khel tawh Jagdeep Singh an neih belh a, Mizorama basketball inelna sang berah hnehna an chang.
Ningani zan Hawla Indoor Stadium inkhelah Hollow hian 68-67 in hnehna an chang a, state pawn player pahnih bakah Lalhmachhuana leh Vanlalṭhazuala te chu player pawimawh an ni.
Mizo pa a dunk
Quarter hmasa berah team pahnih inhnehtawk mah se quarter hnihnaah Mission Veng Vikings an chungnung a, Lalrina Renthlei chu player hmuhnawm a ni.
Tuikhuahtlang tlangval Lalrina hian quarter hnihna tawpna lamah a dunk a, MSL history-a Mizo player zinga dunk hmasa ber a ni. Chak thei turin Vikings dinhmun a ṭha hle.
Hollow an comeback
Chanmari Hollow tan Mohit Bhadu chu match hmasa bera Khatla TBL an hneh loh ṭum aiin a ṭha tawh zawk a, UBA Pro Basketball League club Mumbai Challengers aṭanga an lakluh Jagdeep Singh an chhawr theih tawh bawk avangin MSL kaithar hi an inlan hmasak aiin an ṭha tawh zawk.
Chanmari tan Mizo tlangval an pawimawh a, Hmachhuana chuan a hun takah 3-points a luh bawk avangin chak thei tawh tura ngaih Vikings chu hun tawpah an talbuai hle. Mission Veng-in score theihna turah an hlah a, ṭul loah turn over an siam bawk avangin second 12 a awm chuan 67-67 a ni tawh.
Second khat pawh tling loah (0.9 sec) ah Mohit Bhadu-a'n Khatla tlangval Vanlalṭhafamkima lakah foul a draw a, Dehradun tlangval hian freethrow hmasa zawk khungin Hollow an chak. Inkhel hmuhnawm taka MSL kaithar chak dan hi hnehna hlu bik a ni.
Mahse...
Vikings-in an match hmasa berah Zarkawt Serpents chu Mizo hlangin an hneh a, amaherawhchu MSL Board leh Technical committee-in ni thum hnuah rematch turin thutlukna an siam sak.
Mission Veng lam hian Mohit Bhadu-in foul a hlawh chhuak lai hi chiang takin video-in an la a, foul-ah an ngai loh avangin an protest ve thung. Hollow comeback ropui tak hi Technical Committee thutlukna a zirin danglam thei a ni a, MSL Board ten inenfiah an mamawh.
# TEAM Pld W L Pts GF GA GD
1 Tuikual South BC 2 1 1 3 173 151 22
2 Chanmari Hollow 2 1 1 3 135 136 -1
3 Khatla TBL 1 1 0 2 69 67 2
4 Zarkawt BCA 1 1 0 2 89 87 2
5 Mission Veng Vikings 1 0 1 1 67 68 -1
6 Zarkawt Serpents 1 0 1 1 62 86 -24