Tomas Berdych hnehtu Roger Federer

Roger Federer chuan kum bul a ṭan ṭhat a la chhawm nung zel. Ningani zan khan Federer hian Tomas Berdych hnehin Miami Open semifinal a lut. Federer hian kuminah match 17 hnehna a chang tawh a, vawi khat chiah chak loh a la nei.

Kum 35-a upa Federer hian inkhel inhnehtawk takah 6-2, 3-6, 7-6 (8-6) in hnehna a chang hram. Swiss star hian set hnuhnung ber tie break an khelh laiin Berdych-a'n match point vawi hnih a hmuh tawh chu a pawt thla a, match point ṭum hnih a hmuh ve thung naah Berdych hian double fault neiin Federer a tlang.

Seeded pangana Federer chuan, "Tomas nen kan inhmachhawn ṭum hi chuan thil dangdai leh hriatreng tur hi a thleng fo ṭhin, a vannei zawka ka ṭan avangin ka lawm hle," tiin a sawi.

Quarterfinal inkhel pakhat zawkah Nick Kyrgios chuan match point vawi ruk a hmuh hnuah Alexander Zverev chu 6-4, 6-7(9), 6-3 in a hneh hram bawk. Australian rawlthar Kyrgios hian semifinal-ah Federer a hmachhawn ang.