Merseyside Derby Everton mikhual tur Liverpool

Vawiin tlai dar 5:00-ah Merseyside Derby 228-na khelh a ni dawn a, Liverpool-in hnehna an chang thei a nih chuan league match 13 chhung a zawnin Everton lakah an tlawm tawh lo tihna a ni dawn a, kum 1978-a an record siam an nihrual chiah ang.

Mahse, Liverpool tan beisei ang ngawtin thil a awlsam lo ang - Everton hian an league match hnuhnung 12-ah vawi khat chiah tlawm hmel an hmu a, an match hnuhnung pangaah vawi li ngawt goal an chhuah lo - Reds tlarhma tan hna a hautak dawn.

Lallana tel lohna

Liverpool tan tun season-a player pawimawh ber pawl tih ngam Adam Lallana chu a inlan thei dawn lo a, English midfielder hi ram tana a fehchhuahna lama a malpuiah hliam a tawrh avangin thla khat tal a chawlh a ngai dawn.

Reds tana chanchin lawm­awm lo dang chu captain Jordan Henderson leh Daniel Sturridge an la inlan thei dawn lo. Brazil tana World Cup qualifier khela an fehchhuah hnuah Philippe Coutinho leh Roberto Firminho erawhin club training an zawm leh tawh thung a, Everton hma­chhawn thei tura beisei an ni.

Liverpool tan player dam kim lo hi chhuanlama hman theih a ni dawn bik lo. Everton tan Seamus Coleman, Ramiro Funes Mori leh Morgan Schneiderlin te chu hliam vang vekin an inlan thei dawn lo. Coleman hi Republic of Ireland tana a fehchhuahna lamah a ke ruh a tliah avangin Argentina tana a inlanna a inhliam Mori nen season tawp thleng an inlan thei lo ang.

Reds an chungnung

Merseyside Derby thawnthu hlui keulet chuan Everton aiin Liverpool an chungnung zawk. Premier League-a team pahnih an inhmachhawn hnuhnung 20-ah Reds hi vawi khat chiah an tlawm a, vawi 10 hnehna changin vawi kua chu chak zawk awm loin an inṭhen.

Everton-in Liverpool an hneh hnuhnung ber kuma nau piang te pawh tunah chuan an tlei tawh khawp ang! October 2010 khan Everton hian Goodison Park-ah Liverpool hi 2-0 in an hneh a, he inkhela goal khungtu Tim Cahill chuan A League lamah Melbourne City tan a khel tawh a, goal khungtu pakhat zawk Mikel Arteta phei chuan inkhelh chawlhsanin Manchester City coaching staff zingah a tel daih tawh!

Tun season-a team pahnih intawn hmasak ṭumin Reds hian 1-0 in khualmualah hnehna an chang tawh a, Jurgen Klopp-a'n vawiinah a naute hnehna a chanpui thei a nih chuan Reds manager zinga Merseyside derby match hmasa pathuma hnehna chang nghal thei awmchhun a ni ang.

Minute 90

Premier League-a Mersey­side Derby khelh a nihin red card 21 zet phawrh a ni tawh - boruak a sang ṭhin tih hai rual a ni lo. Liverpool boss Jurgen Klopp chuan, "Kan inkhel tur hi engtiang chiaha pawimawh nge a nih hre turin hun ka mamawh lo. Minute 90 chhung chu Liverpool khawpui hi a reh ṭhuap dawn a ni. Khawpui pakhatah club lian tak pahnih kan awm dun a, khawvel hmun dangah hetiang hi a tam lo," tiin thiam takin a sawi.

Everton striker Romelu Lukaku-a'n tun season Premier League-ah goal khung hnem ber dinhmun a luah mek a, goal 21 zet a khung tawh. Mahse, Belgian striker hian Klopp-a ngaihtuahna a ti buai pha lo. Reds manager chuan, "Lukaku hi ka player duhzawng tak a ni a, striker ṭha tak a ni. Everton hi team ṭha tak an ni tih pawh ka hria. Mahse, Liverpool kan ni a, Anfield-a kan theihna hi eng team mahin ngaihnep chi a ni lo," tiin a ṭawng huai hle.