Club lian inlan hun Mohun Bagan vs Bengaluru FC
India rama club football inelna sang ber I League chu vawiinah khelh ṭan a ni leh tawh dawn a, bul ṭantu tur Mohun Bagan leh Bengaluru an nih avangin boruak a nep thei lo.
Team pahnih inhmachhawnna tur hmun hi Bagan khelmual Balewadi Stadium a ni a, inkhel hi zan dar 7:05-ah Ten 2-ah live-in a en theih ang. I League club dang zingah tun kar tawpa inhmachhawn tur an awm dawn lo thung.
Champion beisei
Mohun Bagan-in hmahruaitu Aizawl FC chu point sarih ngawtin phak lo mek mah se match hniha an khelh tlem zawk avangin champion beiseina an la nei a, an mikhual Bangalore club lakah hnehna chan ngei tumin an khel ang.
Kolkata club-in international break hmaa an match hnuhnung pahniha an hmachhawn chu Bangalore club a ni a, khualmualah ve ve khelin hnehna an chang zo lo ve ve bawk! League match-ah team pahnih hi goal khung loin an inhnehtawk a, AFC Cup group match-ah inhmachhawn lehin Kolkata club hi 2-1 in an tlawm.
Mohun Bagan boss Sanjoy Sen-a'n, "Kan khingpui ber Aizawl FC leh Mohun Bagan aiin match hnihin kan khel tlem zawk a, kan point hniamna zatin kan dinhmun a hril lo," tiin a sawi a, champion theih a la inbeisei - zanin result in an hmalam hun a hrilh thui ang.
Nomawi beisei lo
Bengaluru FC-in an coach hlawhtling Ashley Westwood nen an inṭhen hnuah beiseina sang tak nen Albert Roca an lalut a, Barcelona assistant manager hlui enkawlna hnuaiah AFC Cup final lut nghal mah se I League lamah erawh pangana dinhmun luah mekin champion sawi ngam chi an ni tawh lo - hei vang hian an inthlah dul dawn tihna erawh a ni lo.
South Indian club CEO Parth Jindal chuan, "Inelna kan hmachhawnna apianga nomawi chawi zel hi kan duhdan a ni a, mah se league lama kan dinhmun enin I League erawh beisei ngam chi a ni tawh lo. Chutihrual chuan a sang thei ang berah season khar kan tum hram tur a ni," a ti a, nomawi chawi theih tawh loh vang ngawta inthlahdah lo turin an naute a fuih.
Parth Jindal hi Mohun Bagan nen an inhmachhawn hmasak dawn ṭuma, "Nomawi kan chawi dawn lo a nih chuan Bagan pawhin an chawi bik tur a ni lo," tia a naute fuihtu kha a ni a, Bengaluru-in club neitu thuchah hi an hre reng ang.
Players an chau
International break a nih avangin team pahnihin ram tan players an thawh ve ve a, players zin chauh chungchangah team pahnih tan chhuanlam siamin awmzia a nei dawn lo tihna a ni.
Bengaluru players zingah Nishu Kumar, Sandesh Jhingan, Udanta Singh, Eugeneson Lyngdoh, CK Vineeth leh Daniel Lalhlimpuia te chu India tana feh chhuak zingah an tel a, Mohun Bagan-in Pritam Kotal, Anas Edathodika leh Jeje Lalpekhlua te an thawh ve bawk.
Haiti tan CONCACAF Gold Cup qualifier-ah Bagan chhuanvawr Sony Norde chu Nicaragua laka 3-1 a an chakna inkhelah a inlan bawk a, Ningani zan khan India a rawn thlen leh tawh avangin Bangalore club a mikhual thei ang.
Team Dinhmun
# Team Pld W D L GF GA GD Pts
1 Aizawl FC 14 9 3 2 19 11 8 30
2 East Bengal 14 8 3 3 25 11 14 27
3 Mohun Bagan 12 6 5 1 18 8 10 23
4 Shillong Lajong 13 6 2 5 18 16 2 20
5 Bengaluru FC 13 4 6 3 17 12 5 18
6 Churchill Brothers 14 4 4 6 17 19 -2 16
7 DSK Shivajians 14 3 5 6 15 16 -1 14
8 Chennai City 14 3 4 7 11 21 -10 13
9 Minerva Academy 14 2 6 6 12 23 -11 12
10 Mumbai FC 14 2 4 8 8 23 -15 10