Zanin dar 12:15-ah Chelsea Vs Man City

Premier League-ah champion hriat ti tih tawh mah se inelna erawh a hmuhnawm chho zel. Zanin dar 12:15 hian Champions League khelh tum Chelsea-in an mual Stamford Bridge-ah Manchester City an mikhual dawn a, Frank Lampard hote tan inkhel pawimawh bik a ni.

Club lian pahnih inhma-chhawn hma hian zan dar 10:30-ah Southampton Vs Arsenal leh Burnley Vs Watford te an inkhel bawk ang.

Point dinhmun aṭanga thlir chuan Premier League-a team ṭha ber chu Liverpool an ni a, an player neih dan leh khelh dan hmanga teh erawh chuan Manchester City an ṭha zawk tih pawmtu an tam ngei ang.

Pep Guardiola hote hi season ṭantirhah tlarhnung inhliam vangin an ṭhat dan berin an inlan thei ṭhin lo a, tunah erawh rinrawl Aymeric Laporte a dam tawh avangin City tlarhnung hmaah Arsenal laipui a tlawlh.

Man City hian team ṭha zinga chhal ṭhin Arsenal 3-0 in a sawp tawh a, Burnley 5- 0 in an sawp leh tawh bawk. Match hnihah Pep-a hoten goal an chhuah lo. Clarets an hmachhawn ṭumin Spanish manager hian Gunners an khelh ṭuma defence laia ding Laporte (bench) leh Eric Garcia (inhliam) te chhawr nawn loin Fernandinho leh Nicolas Otamendi te a hmang thung.

A nihna takah chuan Pep-a hian player pathum Ederson, David Silva leh Riyad Mahrez te chiah a chhawr nawn a, Man City squad chhahzia a lang chiang hle. Chelsea nen hian Burnley nena hahdam tir Kevin de Bruyne a rawn let a rinawm a, City ṭha zawk an inlan ngei dawn. Blues tana ngaihthlak nuam awmchhun erawh Sergio Aguero-a inhliam tih zawng a ni. 

Chelsea-in match hnuhnung berah Aston Villa 2-1 in an hneh a, goal an chhuah hnuah Christian Pulisic leh Olivier Giroud te hmangin an lehthal. Frank Lampard-a hote an phur chho zel a, World Cup-a France champion puitu N' Golo Kante leh Olivier Giroud te an kawl avangin London club hi dah hniam theih an ni lo.

Lampard-a hnuaiah Blues-in player hmabak nei êng tak tak an kawl a; Aston Villa nena goal khungtu Christian Pulisic, Mason Mount leh Ruben Loftus-Cheek ten an khelh ṭhat ni an tawng a nih chuan London club hi Man City hneh turin an ṭha tawk. 

Amaherawhchu an intawn hnuhnun berah Chelsea-in Kante hmangin goal hmahruai khung mah se City-in Kevin de Bruyne leh Riyad Mahrez hmangin an lehthal. An intawn hnuhnun ber ṭuma goal khungtute hi inelna 

ṭan leh hnuah an che ṭha vek a, tun ṭumah pawh en bik hlawh turte an ni ang.

Thawhlehni zan inkhelah Leicester City leh Brighton te goal awm loin an inhnehtawk a, Foxes keeper Kasper Schmeichel-a'n Neal Maupay penalty a dang. Leicester-in point thum hlawhchhuahna tura point khat chauh an hmuh avangin Chelsea tan pathumna nih a la beiseiawm hle.

Chutihrualin Frank Lampard-a tan Premier League club a enkawl hmasak berah pathumna nih kher a ṭul lo a, Champions League khelh phak chuan season ṭha tak an hmang tiin a chhal theih. London club hian Europe-a inelna sang ber khel turin club dang ṭanpuina an mamawh lo a, chutihrualin an fixtures a awlsam lo tih hriat tel a ṭha thung.

•    Chelsea hi Bayer Leverkusen winger Kai Havertz nen sawi zawm an ni a, amaherawhchu Frank Lampard-a'n Germany winger kum 21 mi chungchangah Germany club an la dawr loh thu a sawi.

•    Lampard hian inhliam thar an awm loh thu a sawi a, chutihrualin defender Fikayo Tomori-a'n dam turin kar khat a la mamawh a, winger Callum Hudson-Odoi pawhin match fitness a la nei lo bawk.

•    Manchester City boss Pep Guardiola chuan Burnley nena inhliam Sergio Aguero chu Ningani (vawiin) hian Barcelona-ah a khup hliam an zai tur thu a sawi a, August thlaa Champions League ṭan huna Argentine striker dinhmun tur a hriat loh thu a sawi bawk.

•    Spanish manager hian Aguero aiawh turin Gabriel Jesus bakah Raheem Sterling leh Ilkay Gundogan te an awm thu a sawi a, player tan ni thum dana minute 90 chhung khelh tluan reng a theih loh thu a sawi bawk.

•    Man City hi Chelsea zawh hian Liverpool nen June 2, Ningani zanah an inhmachhawn dawn. Reds hi an la champion lo a nih chuan Jurgen Klopp-a hote tan champion nemngheh theihna hun ṭha a ni a, Etihad Stadium-ah khel loin neutral ground-ah khelh theih a ni. Pep Guardiola chuan Premier League thuneitute thu an ngaihchan tur thu a sawi.